கேரளத்தில் அதிர்ச்சி : மாணவர்களுக்குப் போதைப் பொருள் விற்ற 3 பெண் ஆசிரியைகள் கைது!

» செய்திகள் - விளையாட்டு » இந்தியா

கேரளத்தில் அதிர்ச்சி : மாணவர்களுக்குப் போதைப் பொருள் விற்ற 3 பெண் ஆசிரியைகள் கைது!

புதன் 29, ஜூலை 2026 11:01:41 AM (IST)

கோழிக்கோட்டில் பள்ளி வளாகத்தில் மாணவர்களைக் குறிவைத்து ரகசியமாகப் போதைப்பொருள் விற்பனையில் ஈடுபட்டு வந்த 3 பெண் ஆசிரியர்களைக் காவல்துறையினர் கைது செய்தனர்.

கேரள மாநிலம் கோழிக்கோடு மாவட்டம் வடகரா அருகே பேராம்பிராவில் உள்ள ஒரு தனியார் பள்ளியில் பணிபுரியும் பெண் ஆசிரியைகள், பள்ளி வளாகம் மற்றும் அதன் சுற்றுவட்டாரப் பகுதிகளில் போதைப்பொருள் விற்பனை செய்வதாகக் காவல்துறையினருக்குத் தகவல் கிடைத்தது.

இதனைத் தொடர்ந்து, கோழிக்கோடு மாநகரக் காவல் ஆணையரின் உத்தரவின் பேரில், மாநிலத்தில் போதைப்பொருளுக்கு எதிராக நடத்தப்பட்டு வரும் ‘ஆபரேஷன் துபான்’ சிறப்புத் திட்டத்தின் கீழ் பேராம்பிரா காவல்துறையினர் தீவிரக் கண்காணிப்பில் ஈடுபட்டனர்.

காவல்துறையின் விசாரணையில், மருதோம்கரா பகுதியைச் சேர்ந்த கீர்த்தனா என்ற ஆசிரியைக்குச் சர்வதேசப் போதைப்பொருள் கடத்தல் கும்பலுடன் நெருங்கிய தொடர்பு இருப்பது தெரியவந்தது. அவர் இடைத்தரகராகச் செயல்பட்டு, பள்ளி மாணவர்களைக் குறி வைத்துப் போதைப்பொருட்களை விநியோகம் செய்து வந்துள்ளார்.

இதையடுத்து ஆசிரியை கீர்த்தனாவைக் கைது செய்த காவல்துறையினர், அவரைத் தனிப்படை காவலில் எடுத்து விசாரணை நடத்தினர். அவரது வங்கிச் கணக்கு பரிவர்த்தனைகளை ஆய்வு செய்தபோது, அதே பள்ளியில் ஆசிரியையாகப் பணிபுரியும் காவியா என்பவருக்கும் இதில் தொடர்பு இருப்பது கண்டுபிடிக்கப்பட்டது.

இவர்களைத் தொடர்ந்து, இக்கடத்தல் நெட்வொர்க்கில் தொடர்புடைய குற்றோத்து பகுதியைச் சேர்ந்த நிஷ்மா (30) என்ற மற்றொரு ஆசிரியையையும் காவல்துறையினர் கைது செய்தனர். இவர் நேரடியாகப் போதைப்பொருளை விநியோகிக்காமல், கூகுள் பே உள்ளிட்ட ஆன்லைன் மூலம் பணத்தைப் பெற்றுக் கொண்டு, போதைப்பொருள் இருக்கும் இடத்தின் கூகுள் மேப் லொகேஷனை அனுப்பி நூதன முறையில் விற்பனை செய்து வந்தது விசாரணையில் தெரியவந்தது.

இவ்வழக்கில் இதுவரை மொத்தம் 3 பெண் ஆசிரியைகள் கைது செய்யப்பட்டுள்ளனர். இதில் மேலும் சில ஆசிரியர்களுக்கும் தொடர்பு இருக்கலாம் என்ற சந்தேகத்தின் அடிப்படையில் காவல்துறையினர் தீவிர விசாரணை மேற்கொண்டு வருகின்றனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: