» செய்திகள் - விளையாட்டு » இந்தியா
நாடாளுமன்ற தேர்தல் தேதி நாளை அறிவிப்பு - நடத்தை விதிகள் உடனடி அமல்!!
வெள்ளி 15, மார்ச் 2024 4:26:55 PM (IST)
4 மாநில சட்டசபை தேர்தல்கள் மற்றும் நாடாளுமன்ற தேர்தலுக்கான தேதியை தேர்தல் ஆணையம் நாளை அறிவிக்க உள்ளது.
நாடாளுமன்ற மக்களவையின் பதவிக்காலம் வருகிற ஜூன் மாதம் 16-ந்தேதியுடன் முடிவடைய உள்ளது. அதேபோல் ஆந்திர பிரதேசம், சிக்கிம், அருணாச்சல பிரதேசம் மற்றும் ஒடிசா ஆகிய 4 மாநில சட்டசபைகளின் பதவிக்காலமும் ஜூன் மாதத்தில் முடிவடைகிறது. எனவே, அதற்கு முன்பாக வருகிற ஏப்ரல், மே மாதங்களில் நாடாளுமன்ற தேர்தலையும், 4 மாநில சட்டசபை தேர்தல்களையும் நடத்த இந்திய தேர்தல் ஆணையம் திட்டமிட்டுள்ளது.
இந்த நிலையில், தேர்தல் கால அட்டவணை தொடர்பான அறிவிப்பு நாளை(சனிக்கிழமை) பிற்பகல் 3 மணிக்கு வெளியிடப்படும் என தேர்தல் ஆணையம் அறிவித்துள்ளது. தலைமை தேர்தல் ஆணையர் ராஜீவ் குமார் மற்றும் புதிதாக தேர்வு செய்யப்பட்ட தேர்தல் ஆணையர்கள் கூட்டாக தேர்தல் தேதியை அறிவிக்கிறார்கள். தேர்தல் தேதி அறிவிக்கப்பட்ட உடன் தேர்தல் நடத்தை விதிகள் அமலுக்கு வந்துவிடும்.