தொழிற்சாலை தீவிபத்தில் 11 பேர் பலி: உரிமையாளர் மீது கொலை வழக்குப் பதிவு!

டெல்லியில் உள்ள பெயிண்ட் தொழிற்சாலை தீ விபத்தில் 11 பேர் பலியான நிலையில், அதன் உரிமையாளர் மீது போலீசார் கொலை வழக்குப் பதிவு செய்துள்ளனர்.

டெல்லியின் அலிபூா் பகுதியில் உள்ள தயாள்பூா் சந்தையில் உள்ள பெயிண்ட் தொழிற்சாலையில் நேற்று வியாழக்கிழமை மாலை 5.25 மணியளவில் தீ விபத்து ஏற்பட்டது. இதையடுத்து குறைந்தது ஆறு தீயணைப்பு வாகனங்களுடன் வந்த தீயணைப்பு வீரர்கள் தீயை அணைக்க போராடி வந்தனர். ஆனால், தீ மளமளவென முழு கட்டிடத்திற்கும் பரவியது.

இதையடுத்து, மேலும் 20 தீயணைப்பு வாகனங்கள் வரவழைக்கப்பட்டு தீயை அணைக்கும் முயற்சியில் ஈடுபடுத்தப்பட்டு தீ முழுமையாக அணைக்கப்பட்டது. இந்த விபத்தில் 10 ஆண்கள், ஒரு பெண் உள்பட 11 பேர் உயிரிழந்தனர். 4 பேர் காயமடைந்தனர். இறந்தவர்களின் உடல்கள் பிஜேஆர்எம் மருத்துவமனையில் வைக்கப்பட்டு, இறந்தவர்களை அடையாளம் காணும் முயற்சிகள் மேற்கொள்ளப்பட்டு வருகின்றன. அதன் உரிமையாளர் மீது டெல்லி போலீசார் கொலை வழக்குப் பதிவு செய்துள்ளனர்.