எடப்பாடி பழனிசாமிக்கு எதிரான அவதூறு வழக்கு விசாரணைக்கு உச்சநீதிமன்றம் தடை!

எடப்பாடி பழனிசாமிக்கு எதிரான அவதூறு வழக்கு விசாரணைக்கு இடைக்கால தடை விதித்து உச்சநீதிமன்றம் உத்தரவிட்டுள்ளது.

போலி அ.தி.மு.க. உறுப்பினர் அட்டைகளை வழங்கி சட்டவிரோதமாக பணம் வசூலித்ததாக முன்னாள் எம்.பி. கே.சி.பழனிசாமிக்கு எதிராக அ.தி.மு.க. பொதுச்செயலாளர் எடப்பாடி பழனிசாமி சென்னை ஐகோர்ட்டில் வழக்கு தாக்கல் செய்திருந்தார்.

இந்த வழக்கில் தன்னை பற்றி அவதூறாக கூறியிருப்பதாக கூறி கே.சி.பழனிசாமி சென்னை ஜார்ஜ்டவுன் கோர்ட்டில் வழக்கு தொடர்ந்தார். இந்த வழக்கை மாஜிஸ்திரேட்டு தள்ளுபடி செய்தார். இதை எதிர்த்து கே.சி.பழனிசாமி சென்னை ஐகோர்ட்டில் மேல்முறையீடு செய்தார். இதை விசாரித்த ஐகோர்ட்டு, கே.சி.பழனிசாமியின் அவதூறு வழக்கை தள்ளுபடி செய்து மாஜிஸ்திரேட்டு பிறப்பித்த உத்தரவை ரத்து செய்ததோடு, அவதூறு வழக்கு விசாரணையை தொடர வேண்டுமென உத்தரவிட்டது.

இந்தநிலையில், தனக்கு எதிரான அவதூறு வழக்கை மீண்டும் விசாரிக்க சென்னை ஐகோர்ட்டு உத்தரவிட்டதற்கு இடைக்கால தடை விதிக்க வேண்டும் என எடப்பாடி பழனிசாமி சுப்ரீம் கோர்ட்டில் மேல்முறையீடு செய்தார். இந்த மனுவை நீதிபதிகள் பி.ஆர்.கவாய், சந்தீப்மேத்தா ஆகியோர் அடங்கிய அமர்வு விசாரித்தது.

பொதுச்செயலாளராக ஜெயலலிதா இருந்தபோதே கட்சியில் இருந்து கே.சி.பழனிசாமியை நீக்கினார். அதன் பின்னர் கட்சி தொடர்பான அவரது செயல்பாடுகளை தடுக்கவே வழக்கு தொடரப்பட்டது. அதில் தெரிவித்த கருத்துகள் அவதூறானவை இல்லை என எடப்பாடி பழனிசாமி சார்பில் மூத்த வக்கீல் முகுல் ரோத்தகி வாதிட்டார்.

இதற்கு கே.சி.பழனிசாமி சார்பில் ஆஜரான மூத்த வக்கீல் கே.கே.வேணுகோபால் ஆட்சேபம் தெரிவித்தார். வாதங்களை பதிவு செய்து கொண்ட சுப்ரீம் கோர்ட்டு, எடப்பாடி பழனிசாமிக்கு எதிராக கே.சி.பழனிசாமி தாக்கல் செய்துள்ள அவதூறு வழக்கு விசாரணைக்கு தடை விதித்ததுடன், இந்த வழக்கில் தற்போது உள்ள நிலையை தொடர வேண்டும் என்றும் உத்தரவிட்டுள்ளது.