திருமண விழாவில் முதல்வர் ஸ்டாலின் - விஜய் சந்திப்பு

சென்னையில் திருமண விழா ஒன்றில் தமிழக முதல்வர் ஸ்டாலினை நடிகர் விஜய் சந்தித்து பேசிய காட்சிகள் சமூக வலைதளங்களில் வைரலாகி வருகிறது. 

ஏஜிஎஸ் சினிமாஸ் மற்றும் தயாரிப்பு நிறுவனம் உள்ளிட்ட நிறுவனங்களை நடத்தி வரும் கல்பாத்தி எஸ் அகோரம் இல்ல திருமண விழா நேற்று சென்னையில் நடந்தது. இதில் கலந்துகொண்டு மணமக்களை வாழ்த்தினார் நடிகர் விஜய். மணமக்களை வாழ்த்திவிட்டு, வெளியேறும்போது தமிழக முதல்வர் ஸ்டாலினும் திருமண விழாவில் கலந்துகொள்ள வந்தார். முதல்வர் ஸ்டாலின் வருவதை அறிந்த விஜய், அங்கேயே நின்று அவரை வரவேற்றார். 

ஸ்டாலினுக்கு வணக்கம் தெரிவித்து இருவரும் சில நிமிடங்களில் பேசிக்கொண்டனர். பின்னர் உதயநிதி ஸ்டாலினையும் சந்தித்தார் விஜய். நடிகர் விஜய்யின் 'பீஸ்ட்' வரும் 13-ம் தேதி வெளியாகவுள்ளது. இப்படத்தின் தமிழக வெளியீட்டு உரிமையை உதயநிதி ஸ்டாலினின் ரெட் ஜெயன்ட் மூவீஸ் நிறுவனம்தான் கைப்பற்றியுள்ளது குறிப்பிடத்தக்கது. விஜய் நடிக்கும் அவரது 66-வது படம் நேற்று பூஜையுடன் தொடங்கியது. வம்சி பைடிப்பள்ளி இயக்கத்தில் விஜய்க்கு ஜோடியாக ராஷ்மிகா மந்தனா நடிக்கவுள்ளார். தமன் இசையமைக்க உள்ளார்.