அரசு பஸ்களில் மறைமுகமாகக் கட்டணம் உயர்வு? தமிழக அரசு விளக்கம்!

அரசு பஸ்களில் மறைமுகமாகக் கட்டண உயர்வு செய்யப்பட்டுள்ளதாக சமூக வலைதளங்களில் பரவி வரும் தகவலில் உண்மையில்லை என்று தமிழக அரசு திட்டவட்டமாக மறுத்துள்ளது.

மகளிர் உரிமைத் தொகை மற்றும் கோடை கால நிவாரண நிதி என அரசு வழங்கிய 5,000 ரூபாயை, பஸ் கட்டண உயர்வின் மூலம் அரசு மறைமுகமாகத் திரும்பப் பெறுகிறது என்ற தகவல் சமூக வலைதளங்களில் வேகமாகப் பரவியது. குறிப்பாக, ஸ்ரீவில்லிபுத்தூரில் இருந்து மதுரைக்குச் செல்ல சாதாரண பஸ்களில் 75 ரூபாயாக இருந்த கட்டணம், தற்போது 100 ரூபாயாக உயர்த்தப்பட்டுள்ளதாகப் பயணச் சீட்டுகளுடன் கூடிய ஆதாரங்கள் பகிரப்பட்டன. இது பொதுமக்களிடையே பெரும் அதிருப்தியை ஏற்படுத்தியது.

இந்த விவகாரம் குறித்து தமிழக அரசின் அதிகாரப்பூர்வ 'தகவல் சரிபார்ப்பகம்' (Fact Check) விரிவான விளக்கத்தை அளித்துள்ளது. இது குறித்து மதுரை போக்குவரத்துக்கழக விருதுநகர் மண்டல உதவி மேலாளர் கூறுகையில்:

"ராஜபாளையம் கிளையில் இயங்கும் தடம் எண் 940ஏ (940A) என்ற பேருந்து, குளிர்சாதன (AC) வசதி கொண்ட பேருந்தாகும். இது ராஜபாளையம் - திருச்சி வழித்தடத்தில் இயங்குகிறது. இந்தப் பேருந்தில் ஸ்ரீவில்லிபுத்தூரில் இருந்து மதுரைக்குச் செல்ல 100 ரூபாய் வசூலிக்கப்படுவது, குளிர்சாதன பேருந்துக்கான நிர்ணயிக்கப்பட்ட கட்டணமே தவிர, அது கட்டண உயர்வு அல்ல. சாதாரண பேருந்துகளில் வழக்கம் போல 75 ரூபாயே கட்டணமாக வசூலிக்கப்படுகிறது. எந்தவிதமான கட்டண உயர்வும் செய்யப்படவில்லை," எனத் தெளிவுபடுத்தியுள்ளார்.

இந்தக் குழப்பம் குளிர்சாதன பேருந்து மற்றும் சாதாரண பேருந்து கட்டணங்களுக்கு இடையே இருந்த புரிதல் இடைவெளியால் ஏற்பட்டது என்பது இதன் மூலம் உறுதியாகியுள்ளது. எனவே, சமூக வலைதளங்களில் பரவும் ஆதாரமற்ற தகவல்களை நம்ப வேண்டாம் என்று அரசு அறிவுறுத்தியுள்ளது.