மாணவியின் இன்ஸ்டாகிராம் கணக்கு விவரத்தை பெறுவதில் மோதல்: மாணவர் உள்பட 2 பேர் கைது!

நெல்லையில் மாணவியின் இன்ஸ்டாகிராம் கணக்கு விவரத்தை பெறுவதில் ஏற்பட்ட மோதலில் பள்ளி மாணவர் உள்பட 2 பேர் கைது செய்யப்பட்டனர்.

நெல்லையை அடுத்து ஒரு கிராமத்தில் இயங்கிவரும் அரசு பள்ளியில் படிக்கும் மாணவர்களும், பாளையங்கோட்டை பகுதியில் உள்ள அரசு உதவி பெறும் ஒரு பள்ளியில் படிக்கும் 10-ம் வகுப்பு மாணவர்கள் சிலரும் நேற்று முன்தினம் பாளையங்கோட்டை பஸ் நிலையத்தில் நின்று கொண்டிருந்தனர். அப்போது அவர்களுக்குள் திடீரென மோதல் ஏற்பட்டது. இதில் அவர்கள் ஒருவரை ஒருவர் தாக்கிக் கொண்டனர். இதுபற்றி தகவல் அறிந்த போலீசார் அங்கு விரைந்து சென்றனர். போலீசாரை கண்டதும் மாணவர்கள் தப்பி ஓடிவிட்டனர். 

அங்குள்ள கண்காணிப்பு கேமராவில் பதிவாகி இருந்த காட்சிகளை கொண்டு போலீசார் விசாரணை நடத்தினர். அந்த காட்சியில் பதிவாகி இருந்த அரசு பள்ளி மாணவர்களை பிடித்து விசாரித்தனர். விசாரணையில், அந்த பள்ளியில் படிக்கும் ஒரு மாணவியின் செல்போன் ‘இன்ஸ்டாகிராம்' கணக்கை, சக மாணவர்களிடம் மற்றொரு பள்ளியில் படிக்கும் 10-ம் வகுப்பு மாணவர்கள் கேட்டுள்ளனர். அதை கொடுக்க மறுத்ததால், ஆத்திரமடைந்த அவர்கள் தாக்குதலில் ஈடுபட்டு உள்ளனர். இந்த தாக்குதலில் காயம் அடைந்த அரசு பள்ளி மாணவர் ஒருவர் அரசு ஆஸ்பத்திரியில் சிகிச்சை பெறுவதும் போலீஸ் விசாரணையில் தெரியவந்தது.

இதுதொடர்பாக பாளையங்கோட்டை போலீசார் வழக்குப் பதிவு செய்து, அரசு உதவி பெறும் பள்ளியில் 10-ம் வகுப்பு படிக்கும் மாணவரையும், அதே பள்ளியில் பாதியில் படிப்பை நிறுத்திய மற்றொரு மாணவர் என 2 பேரையும் கைது செய்து விசாரணை நடத்தி வருகின்றனர்.