நாம் தமிழர் கட்சி வேட்பாளர் மு.அனுசுயா தீவிர பிரசாரம் : தலைவர்களின் சிலைகளுக்கு மாலை அணிவித்து மரியாதை!

தமிழகச் சட்டமன்றத் தேர்தலை முன்னிட்டு, ஓட்டப்பிடாரம் சட்டமன்றத் தொகுதி நாம் தமிழர் கட்சி வேட்பாளர் மு.அனுசுயா, தலைவர்களின் சிலைகளுக்கு மாலை அணிவித்துத் தனது தேர்தல் பரப்புரையைத் தொடங்கினார்.

ஓட்டப்பிடாரம் தொகுதியில் நாம் தமிழர் கட்சி சார்பாகப் போட்டியிடும் மு.அனுசுயா நேற்று தனது பிரசாரத்தைத் தொடங்கினார். இதையொட்டி, தொகுதியின் பல்வேறு பகுதிகளில் உள்ள முக்கியத் தலைவர்களின் சிலைகளுக்கு அவர் மாலை அணிவித்து மரியாதை செலுத்தினார்:

வல்லநாடு பசும்பொன் முத்துராமலிங்கத் தேவர் சிலை, காசிலிங்கபுரம் சுதந்திரப் போராட்டத் தியாகி சுந்தரலிங்கனார் சிலை, ஓசனூத்து சமூகப் போராட்டத் தியாகி இம்மானுவேல் சேகரனார் சிலை, ஓட்டப்பிடாரம் கப்பலோட்டிய தமிழன் வ.உ.சிதம்பரனார் சிலை, கவர்னகிரி தியாகி சுந்தரலிங்கனார் சிலை, தருவைகுளம் பெருந்தலைவர் காமராஜர் சிலை, மேலும், சட்டமேதை அம்பேத்கர் சிலைக்கும் அவர் மாலை அணிவித்து மரியாதை செலுத்தினார்.

சிலைகளுக்கு மரியாதை செலுத்திய பின், அப்பகுதி பொதுமக்களிடம் கட்சியின் கொள்கைகள் அடங்கிய துண்டறிக்கைகளை (Pamphlets) வழங்கினார். நாம் தமிழர் கட்சியின் 'விவசாயி' சின்னத்திற்கு வாக்குகள் கேட்டு அவர் தீவிரமாகப் பரப்புரை மேற்கொண்டார். இந்த நிகழ்விற்கு மாநில ஒருங்கிணைப்பாளர்கள் மா.மு. தமிழ்நேயன், சு. அன்னலட்சுமி ஆகியோர் தலைமை தாங்கினர். மண்டலச் செயலாளர் இ. மாரிமுத்து முன்னிலை வகித்தார்.

இந்நிகழ்வில் மாநிலப் பாசறைப் பொறுப்பாளர்கள் செ. பரதேசி, துரைசிங் செந்தில்குமார், அந்தோணி பிச்சை மற்றும் மாவட்டப் பொறுப்பாளர்கள் அந்தோணி ராஜன், ராஜேந்திரன், செல்லப்பா, சேரந்தைராஜ், மாடசாமி, தேவராஜ், ராஜதுரை, சுடலைமணி, முருகேசன், நாகராஜ், முத்துக்குமார், கொலஞ்சி உள்ளிட்ட திரளான கட்சித் தொண்டர்கள் மற்றும் உறவுகள் கலந்துகொண்டு எழுச்சியுடன் பரப்புரையில் ஈடுபட்டனர்.