முதிர்வுத் தொகை தரமறுத்த இன்சூரன்ஸ் நிறுவனம்: ரூ.3லட்சம் வழங்க நுகர்வோர் குறைதீர் ஆணையம் உத்தரவு!

சேவைக் குறைபாடு காரணமாக பாதிக்கப்பட்ட நுகர்வோருக்கு இன்சூரன்ஸ் நிறுவனம்  ரூ.3,05,000 வழங்க தூத்துக்குடி மாவட்ட நுகர்வோர் குறைதீர் ஆணையம் உத்தரவிட்டது.

தூத்துக்குடி மாவட்டம் ஓட்டப்பிடாரம் வட்டம் மலைப்பட்டி கிராமம் நடுத் தெருவைச் சார்ந்த செல்வராஜ் என்பவர் மத்திய அரசின் பொதுத் துறை இன்ஸ்யூரன்ஸ் நிறுவனத்தில் பாலிசி எடுத்திருந்தார். பின்னர் அவருக்கு விபத்து ஏற்பட்டதால் மருத்துவமனையில் சிகிச்சை பெற்றுள்ளார். அதன் பின்னர் செல்வராஜ் இறந்து விட்டார். 

இதையடுத்து அவரது மனைவி சுப்புலெட்சுமி மற்றும் அவரது வாரிசுதாரர்கள் இன்சூரன்ஸ் நிறுவனத்திடம் காப்பீடு செய்ததன் அடிப்படையில் முதிர்வுத் தொகையை தருமாறு கேட்டுள்ளனர். ஆனால் இன்சூரன்ஸ் நிறுவனம் சரியான காரணங்களை கூறாமல் பணத்தை தர மறுத்துள்ளது. இதைக் கண்ட புகார்தாரர் அதிர்ச்சியும், தாங்க முடியாத வேதனையும் அடைந்து உடனடியாக வழக்கறிஞர் மூலம் நோட்டீஸ் அனுப்பியுள்ளார். ஆனால் இதன் பின்னரும் உரிய பதில் கிடைக்காததால் மன உளைச்சலுக்கு ஆளான நுகர்வோர் தூத்துக்குடி மாவட்ட நுகர்வோர் குறைதீர் ஆணையத்தில் வழக்கு தொடர்ந்தார்.

வழக்கை விசாரித்த தூத்துக்குடி மாவட்ட நுகர்வோர் குறைதீர் ஆணைய தலைவர் திருநீல பிரசாத், உறுப்பினர்கள் ஆ.சங்கர்,  நமச்சிவாயம் ஆகியோர் காப்பீட்டுத் தொகை ரூ.2,50,000 சேவை குறைபாடு மற்றும் மன உளைச்சலுக்கு  நஷ்ட ஈடு தொகை ரூ.50,000, வழக்கு செலவுத் தொகை ரூ.5,000 ஆக மொத்தம் ரூ.3,05,000 ஐ இரு மாத காலத்திற்குள் வழங்க வேண்டும் இல்லையென்றால் அத்தொகையை செலுத்தும் தேதி வரை ஆண்டொன்றுக்கு 9 சதவீதம் வட்டியுடன் வழங்க வேண்டும் என உத்திரவிட்டனர்.