சிறுவனை கத்தியால் தாக்கியதாக 2பேர் கைது

கோவில்பட்டியில் முன் விரோத்தில் சிறுவனைக் கத்தியால் தாக்கியதாக மற்றொரு சிறுவன் உட்பட 2பேரை போலீசார் கைது செய்தனர். 

இதுகுறித்து போலீஸ் தரப்பில் கூறப்படுவதாவது : தூத்துக்குடி மாவட்டம், கோவில்பட்டி புதுகிராமம் 4ஆவது தெருவைச் சேர்ந்த கு. மாரிமுத்துவின் மகன்கள் சங்கரநாராயணன், பாண்டீஸ்வரன் (14). சங்கர நாராயணனுக்கும் அதே பகுதியைச் சேர்ந்த வென்னிமலை மகன் வேலு என்ற முனியசாமிக்கும் கடந்த தீபாவளி பண்டிகையின்போது பட்டாசு வெடிப்பது தொடர்பாக தகராறு ஏற்பட்டு, கிழக்கு காவல் நிலையத்தில் புகார் அளிக்கப்பட்டதாம்.

இந்நிலையில், அங்குள்ள அம்மன் கோயில் அருகே பாண்டீஸ்வரன் தனது நண்பர்களுடன் விளையாடிக் கொண்டிருந்தார். அப்போது, வேலு உள்ளிட்ட மூவர் வந்து, பாண்டீஸ்வரனின் அண்ணனால்தான் பிரச்னை ஏற்பட்டது எனக் கூறியதுடன், அச்சிறுவனை வேலு கத்தியால் தாக்கினாராம். இதைப் பார்த்த அப்பகுதியினர் கண்டித்ததும் அந்த 3 பேரும் பாண்டீஸ்வரனுக்கு கொலை மிரட்டல் விடுத்துவிட்டு தப்பியோடினராம். 

இதில், காயமடைந்த அவர் கோவில்பட்டி அரசு மருத்துவமனையில் அனுமதிக்கப்பட்டார். புகாரின்பேரில், கிழக்கு காவல் நிலைய போலீஸார் வழக்குப் பதிந்து, 17 வயது சிறுவன், புதுகிராமம் ஓடைத் தெரு முருகேசன் மகன் முத்துப்பாண்டி (19) ஆகிய இருவரைக் கைது செய்தனர். வேலுவை போலீசார் தேடிவருகின்றனர்.