தங்கலான் ரிலீஸான தியேட்டரில் ரசிகர்கள் வாக்குவாதம்: தூத்துக்குடியில் பரபரப்பு!

தூத்துக்குடியில் விக்ரம் நடித்துள்ள தங்கலான் திரைப்படம் வெளியான திரையரங்கில் ஆடியோ முறையாக கேட்காததால் தியேட்டர் நிர்வாகத்தினருடன்  ரசிகர்கள் வாக்குவாதத்தில் ஈடுபட்டனர். 

நடிகர் விக்ரம் நடித்து இயக்குனர் ரஞ்சித் இயக்கியுள்ள தங்கலான் திரைப்படம் பெரும் எதிர்பார்ப்புக்கிடையே இன்று வெளியானது. தூத்துக்குடியில் புதிதாக நவீன வசதிகளுடன் திறக்கப்பட்டுள்ள கிளியோபாட்ரா திரையரங்கில் இன்று இந்த படம் வெளியாகி காலை9:30  மணிக்கு திரைப்படம் திரையிடப்பட்டது. திரைப்படம் திரையிட்டது முதல் திரைப்படத்தின் ஆடியோ முறையாக திரையரங்கில் இருந்த ரசிகர்களுக்கு கேட்காததை தொடர்ந்து திரையரங்க நிர்வாகத்திடம் ரசிகர்கள் மற்றும் பொதுமக்கள் முறையிட்டனர்.

ஆனால் நிர்வாகம் இதற்கு உரிய பதிலளிக்காததை தொடர்ந்து திரைப்படம் பார்க்க வந்த ரசிகர்கள் மற்றும் பொதுமக்கள் திரையரங்கை விட்டு வெளியே வந்து திரையரங்க ஊழியர்களுடன் கடும் வாக்குவாதத்தில் ஈடுபட்டனர். இதன் காரணமாக அங்கு பரபரப்பு ஏற்பட்டது. இதை தொடர்ந்து திரையரங்க நிர்வாகம் சார்பில் திரைப்படம் காண வந்த ரசிகர்கள் மற்றும் பொதுமக்களுக்கு டிக்கெட் பணம் திருப்பி வழங்கப்பட்டது. இதன் காரணமாக திரைப்படத்தை காண வந்த ரசிகர்கள் ஏமாற்றத்துடன் திரும்பி சென்றனர்.