தூத்துக்குடி வ .உ.சிதம்பரம் கல்லூரி இந்திய அளவில் 28வது இடம்!

தூத்துக்குடி வ.உ.சிதம்பரம் கல்லூரி தேசிய தர வரிசையில் 28வது இடம், தமிழக அளவில் 8வது இடம் பிடித்துள்ளது. 

தூத்துக்குடி வ.உ. சிதம்பரம் கல்லூரி ஏறத்தாழ இந்தியாவிலுள்ள நாற்பத்தி எட்யிரம் உயர்கல்வி நிறுவனங்களை உள்ளடக்கிய இந்திய தேசிய தர வரிசை பட்டியல் 2024-ல் இந்திய அளவில் 28வது இடம், தமிழக அளவில் 8வது இடம், மனோன்மணியம் சுந்தரனார் பல்கலைகழகதிற்குட்பட்ட 103 கல்லூரிகளில் முதல் இடம் பெற்று சாதனை படைத்துள்ளது. இது கல்லூரியின் வரலாற்றில் ஓர் மைல்கல் என்றால் மிகையல்ல என்று கல்லூரி முதல்வர் சொ.வீரபாகு தெரிவித்தார்.

இது தொடர்பாக அவர் கூறியதாவது, ”கற்றல் மற்றும் கற்பித்தலுக்கான வளங்கள் (TLR), சமூக அளவிலும் பொருளாதார அளவிலும் பிற்படுத்தப்பட்ட மாணவ மாணவியர்களுக்கு கல்வி அளித்தல் (ESCS)ஆராய்ச்சி ஆக்கக்கூறுகள் (Research Components), கல்லூரியிலிருந்து வெற்றிகரமாக பட்டப்படிப்பை முடித்து வெளியேறும் மாணவ மாணவியர் எண்ணிக்கை (Graduate Outcome), தேர்ச்சி விழுக்காடு (Pass Percentage), உயர்கல்வி மற்றும் வேலைவாய்ப்பு (Higher Studies and Placements), புலன் உணர்வு (Perception) ஆகிய கூறுகளின் அடிப்படையில் இந்த தரவரிசை அமைந்திருப்பதால் எல்லா தளங்களிலும் வ.உ.சிதம்பரம் கல்லூரி பெற்ற படிப்படியான வளர்ச்சியையே இது காட்டுகிறது.

எதிர்காலத்தில் நாம் இன்னும் நம்மை மேம்படுத்திக் கொள்ள வேண்டியுள்ளது. இன்று இந்தியாவில் உள்ள ஒட்டுமொத்த கல்லூரிகளும் நம்மை உற்று நோக்கி கொண்டிருக்கிறது. வ.உ.சிதம்பரம் கல்லூரியின் மூலமாக தூத்துக்குடி நகரும் தேசிய அளவில் கவனம் பெறுவதில் மகிழ்ச்சி. இந்த பெருமையை தொடர்ந்து நிலைநாட்டுவதற்கான பொறுப்பு நம் கரங்களில் இருக்கிறது என்பதை மனதில் நிறுத்தி நாங்கள் வெற்றிகரமாக பணிபுரிய வேண்டும் என்று விரும்புகிறேன்". இவ்வாறு கல்லூரி முதல்வர் சொ.வீரபாகு கூறினார்.