ஹார்முஸ் ஜலசந்தி முடக்கம்: அமெரிக்கா பின்வாங்க சவுதி அரேபியா வலியுறுத்தல்

ஈரானுடனான மோதல் போக்கைக் கைவிட்டு, ஹார்முஸ் ஜலசந்தியில் ஏற்படுத்தப்பட்டுள்ள முடக்கத்தை அமெரிக்கா நீக்க வேண்டும் என்று சவுதி அரேபியா கோரிக்கை விடுத்துள்ளது.

கடந்த ஏப்ரல் 11-ம் தேதி அமெரிக்கா மற்றும் ஈரான் இடையே நடைபெற்ற அமைதிப் பேச்சுவார்த்தை தோல்வியில் முடிந்தது. இதனைத் தொடர்ந்து, ஈரானை ஒட்டியுள்ள ஹார்முஸ் ஜலசந்தியின் (Strait of Hormuz) இருபுறமும் சரக்கு மற்றும் எண்ணெய் கப்பல் போக்குவரத்தை அமெரிக்க ராணுவம் முடக்கியது. ஈரான் துறைமுகங்களில் இருந்து வரும் எந்தவொரு கப்பலும் இந்த ஜலசந்தியைக் கடக்க அமெரிக்கா தடை விதித்துள்ளது.

இதற்குப் பதிலடியாக, வளைகுடா நாடுகளின் கப்பல்கள் தங்கள் கடல் எல்லை வழியாகச் செல்ல ஈரான் ராணுவம் அனுமதி மறுத்து வருகிறது. இரு நாடுகளின் இந்த ராணுவ நடவடிக்கைகளால் ஹார்முஸ் ஜலசந்தியில் போக்குவரத்து முற்றிலும் முடங்கியுள்ளது. ஈரான் மீது தாக்குதல் நடத்தப்பட்டால் வளைகுடா நாடுகளின் துறைமுகங்கள் மீது தாக்குதல் நடத்துவோம் என ஈரான் எச்சரித்துள்ளது. 

இது குறித்து சவுதி அரேபிய அரசு வட்டாரங்கள் தெரிவிப்பதாவது: பெர்சிய வளைகுடா மற்றும் செங்கடல் இடையே அமைந்துள்ள சவுதி அரேபியா, தற்போது ஹார்முஸ் ஜலசந்தி மூடப்பட்டுள்ளதால் செங்கடல் வழியாகப் போக்குவரத்தை மேற்கொண்டு வருகிறது. பாப் அல் மண்டேப் அபாயம்: ஈரானின் ஆதரவு பெற்ற ஏமனின் ஹவுத்தி கிளர்ச்சியாளர்கள், செங்கடலில் உள்ள 'பாப் அல் மண்டேப்' (Bab al-Mandab) ஜலசந்தியை மூடும் அபாயம் உள்ளது. அவ்வாறு நடந்தால் சவுதி அரேபியாவின் கடல்வழிப் போக்குவரத்து முழுமையாகத் துண்டிக்கப்படும்.

உலகளாவிய தாக்கம்: இந்த முடக்கம் நீடித்தால் உலக அளவில் கச்சா எண்ணெய் பற்றாக்குறை ஏற்படும் என எச்சரிக்கப்பட்டுள்ளது. உரங்கள் கிடைப்பதில் சிக்கல் ஏற்பட்டு, உலகளாவிய உணவு தானிய உற்பத்தி பாதிக்கப்படும். வளைகுடா நாடுகளின் ஏற்றுமதி மற்றும் இறக்குமதி கடுமையாகப் பாதிக்கப்பட்டுப் பொருளாதார நெருக்கடி உருவாகும்.

எனவே, சர்வதேச நலன் கருதி அமெரிக்கா தனது முடக்கத்தை உடனடியாகக் கைவிட வேண்டும் எனச் சவுதி அரேபியா வலியுறுத்தியுள்ளது. இந்தத் தகவலை அமெரிக்காவின் பிரபல 'வால் ஸ்ட்ரீட் ஜர்னல்' (Wall Street Journal) நாளிதழும் உறுதிப்படுத்தியுள்ளது.