திமுக அரசின் ஊழல் ஆட்சியைத் தமிழக மக்கள் விரும்பவில்லை - பிரதமர் மோடி

"நாகர்கோவிலில் நடைபெற்ற சாலைப் பேரணி ஈடு இணையற்ற உற்சாகத்தால் நிரம்பி இருந்தது. திமுகவின் தவறான நிர்வாகத்தையும், ஊழலையும் தமிழ்நாடு மக்கள் விரும்பவில்லை என்பது இதிலிருந்து தெளிவாகிறது," எனப் பிரதமர் நரேந்திர மோடி தெரிவித்துள்ளார்.

தமிழக சட்டமன்றத் தேர்தலை முன்னிட்டு, கன்னியாகுமரி மாவட்டத்தில் போட்டியிடும் அதிமுக தலைமையிலான தேசிய ஜனநாயகக் கூட்டணி வேட்பாளர்களை ஆதரித்துப் பிரதமர் நரேந்திர மோடி நேற்று நாகர்கோவிலில் பிரம்மாண்ட சாலைப் பேரணி நடத்தினார். திருவனந்தபுரத்திலிருந்து ஹெலிகாப்டர் மூலம் நாகர்கோவில் வந்த அவர், வேப்பமூடு முதல் வடசேரி வரை சுமார் 1.5 கி.மீ. தூரம் திறந்தவெளி வாகனத்தில் சென்று மக்களிடம் வாக்கு சேகரித்தார்.

இந்தப் பேரணியில் அதிமுக பொதுச்செயலாளர் எடப்பாடி பழனிசாமி, பாஜக மாநிலத் தலைவர் நயினார் நாகேந்திரன், முன்னாள் தலைவர்கள் பொன். ராதாகிருஷ்ணன், அண்ணாமலை மற்றும் கூட்டணி கட்சிகளான பாமக, அமமுக நிர்வாகிகள் பங்கேற்றனர். பேரணிக்குப் பிறகு தனது 'எக்ஸ்' (X) தளப் பக்கத்தில் பதிவிட்டுள்ள பிரதமர் மோடி: "நாகர்கோவில் சாலைப் பேரணி ஈடு இணையற்ற உற்சாகத்தால் நிரம்பி இருந்தது. மாநிலத்தில் மக்களை மையமாகக் கொண்ட சிறந்த ஆட்சியைத் தேசிய ஜனநாயகக் கூட்டணி வழங்கும். மாற்றத்தை விரும்பும் மக்கள் எழுச்சி இங்கே பிரதிபலிக்கிறது," எனக் குறிப்பிட்டுள்ளார்.