தமிழ்நாடு அரசு கூட்டுறவுத் துறை ஊழியர் சங்கம் சார்பில் தூத்துக்குடியில் கவன ஈர்ப்பு ஆர்ப்பாட்டம்!

தமிழ்நாடு அரசு கூட்டுறவுத் துறை ஊழியர் சங்கத்தின் தூத்துக்குடி மாவட்ட மையம் சார்பில், இணைப்பதிவாளர் அலுவலகம் முன்பு பல்வேறு கோரிக்கைகளை வலியுறுத்தி மாலை நேர கவன ஈர்ப்பு கண்டன ஆர்ப்பாட்டம் நடைபெற்றது.

இராமநாதபுரம் மண்டலத்தைச் சேர்ந்த கூட்டுறவு சார்பதிவாளர் வேல்முருகனுக்கு வழங்கப்பட்ட தற்காலிகப் பணிநீக்க ஆணையினை உடனடியாக ரத்து செய்ய வேண்டும் என்றும், பதிவாளரின் ஊழியர் விரோதப் போக்கு மற்றும் கூடுதல் பதிவாளர் (நுகர்வோர் பணிகள்) அவர்களின் தன்னிச்சையான தவறான அணுகுமுறையைக் கண்டித்தும் இப்போராட்டம் நடத்தப்பட்டது. கூட்டுறவுத் துறை அமைச்சரின் கவனத்தை ஈர்க்கும் வகையில் இந்த மாலை நேரக் கவன ஈர்ப்புப் போராட்டம் நடைபெற்றது.

இராமநாதபுரம் மாவட்டச் சேர்ந்த வேல்முருகன் என்பவரின் பணிநீக்க ஆணையை உடனடியாக ரத்து செய்ய வேண்டும். அனைத்துப் பணிகளுக்கும் போதிய அவகாசம் கொடுத்துப் பணி செய்ய ஆணை பிறப்பிக்க வேண்டும்.கண்காணிப்புச் சாட்டு நடவடிக்கைகள்: இனிவரும் காலங்களில் 'கண்காணிக்கத் தவறினார்' என்ற காரணத்திற்காக ஊழியர்கள் மீது நடவடிக்கை மேற்கொள்ளக் கூடாது.

அனைத்து நிலைகளிலும் நிலுவையிலுள்ள பதவி உயர்வுகளை வழங்கிட வேண்டும். அரசாணை வெளியிடப்பட்டு ஓராண்டாகியும் பணி ஆணை வழங்கப்படாத மூன்று துணைப் பதிவாளர்களுக்கு உடனடியாகப் பணி அமர்வு ஆணை வழங்கப்பட வேண்டும். அனைத்து நிலைகளிலும் நிறுத்தி வைக்கப்பட்டுள்ள பொதுப்பணி இடமாறுதல்களை உடனடியாக அமல்படுத்த வேண்டும் உள்ளிட்ட கோரிக்கைகளை வலியுறுத்தி நடைபெற்ற ஆர்ப்பாட்டத்தில் கூட்டுறவுத் துறை அதிகாரிகள் மற்றும் ஊழியர்கள் திரளாகக் கலந்துகொண்டு கோரிக்கைகளை வலியுறுத்தி முழக்கங்களை எழுப்பினர்.