வீடுபுகுந்து பணம், செல்போன் திருடிய வாலிபர் கைது!

ஆறுமுகநேரியில் நள்ளிரவில் வீடுபுகுந்து ரூ.22 ஆயிரம் ரொக்கம் மற்றும் செல்போனைத் திருடிச் சென்ற வாலிபரை போலீசார் கைது செய்து சிறையில் அடைத்தனர்.

தூத்துக்குடி மாவட்டம் ஆறுமுகநேரி லட்சுமிமாநகரம் மேற்குத் தெருவைச் சேர்ந்தவர் மூடிசூடலை ரமேஷ் (53). சம்பவத்தன்று இரவு இவரது தாயார் ஜானகியம்மாள் வீட்டின் வராண்டாவில் தூங்கிக் கொண்டிருந்தார். அன்று நள்ளிரவில் வீட்டிற்குள் புகுந்த மர்ம நபர், ஜானகியம்மாள் தலையணைக்கு அடியில் வைத்திருந்த செல்போன் மற்றும் வீட்டின் பானைக்குள் வைத்திருந்த ரூ.22,000 ரொக்கப் பணம் ஆகியவற்றைத் திருடிச் சென்றுவிட்டார்.

இது குறித்து மூடிசூடலை ரமேஷ் அளித்த புகாரின் பேரில், ஆறுமுகநேரி காவல் நிலைய உதவி ஆய்வாளர் இருதயராஜ் வழக்குப் பதிவு செய்து தீவிர விசாரணை நடத்தினார். போலீசாரின் விசாரணையில், ஆறுமுகநேரி பாரதி நகரைச் சேர்ந்த சக்திவேல் (33) என்பவர்தான் நள்ளிரவில் வீடுபுகுந்து பணம் மற்றும் செல்போனைத் திருடிச் சென்றது தெரியவந்தது.

இதனைத் தொடர்ந்து தலைமறைவாக இருந்த சக்திவேலை ஆறுமுகநேரி போலீசார் கைது செய்தனர். அவரிடமிருந்து திருடப்பட்ட ரூ.22,000 ரொக்கம் மற்றும் செல்போன் பறிமுதல் செய்யப்பட்டது. பின்னர், கைது செய்யப்பட்ட சக்திவேலை திருச்செந்தூர் நீதிமன்றத்தில் போலீசார் ஆஜர்படுத்தினர். நீதிபதியின் உத்தரவைத் தொடர்ந்து அவர் பாளையங்கோட்டை மத்திய சிறையில் அடைக்கப்பட்டார்.