வெற்றிச் சான்றிதழுடன் பனையூர் வாருங்கள்: த.வெ.க. வேட்பாளர்களுக்கு விஜய் உத்தரவு!

"தேர்தலில் வெற்றி பெற்றவுடன் நேரடியாகப் பனையூர் அலுவலகத்திற்கு வர வேண்டும்" என த.வெ.க. வேட்பாளர்களுக்கு அக்கட்சியின் தலைவர் விஜய், அறிவுரை வழங்கியுள்ளார். 

தமிழகச் சட்டமன்றத் தேர்தலில் எடப்பாடி தொகுதி நீங்கலாக 233 தொகுதிகளில் த.வெ.க. களம் கண்டுள்ளது. முதன்முறையாகத் தேர்தலைச் சந்தித்த அக்கட்சியின் களப்பணிகள் மற்றும் வெற்றி வாய்ப்புகள் குறித்து ஆலோசிக்க, வேட்பாளர்கள் அனைவரும் இன்று சென்னைக்கு அழைக்கப்பட்டிருந்தனர். வரும்போது, வாக்குப்பதிவு நாளன்று தேர்தல் நடத்தும் அலுவலர்களால் வழங்கப்பட்ட '17-சி' (Form 17C) படிவத்தின் நகல்களைக் கொண்டு வருமாறு அவர்களுக்கு ஏற்கனவே உத்தரவிடப்பட்டிருந்தது.

பனையூரில் சந்திப்பு

சென்னையை அடுத்த பனையூரில் உள்ள கட்சி அலுவலகத்தில் இன்று மதியம் வேட்பாளர்களைச் சந்தித்த விஜய், அவர்களிடம் தொகுதி நிலவரங்களைக் கேட்டறிந்தார். அப்போது வேட்பாளர்கள் மத்தியில் அவர் பேசியதாவது: தேர்தலில் நாம் அமோக வெற்றி பெறுவோம் என்ற நம்பிக்கை எனக்கு உள்ளது. இதுவரை நீங்கள் ஆற்றிய களப்பணி பாராட்டுக்குரியது.

வாக்கு எண்ணிக்கை முடிந்து நீங்கள் வெற்றி பெற்றவுடன் வேறு எங்கும் சென்றுவிடாதீர்கள். உடனடியாகப் பனையூர் அலுவலகத்திற்கு வந்துவிடுங்கள். உங்களுக்காக நான் இங்கே காத்திருப்பேன். வாக்கு எண்ணிக்கை நாளன்று மையங்களில் மிகவும் விழிப்புடன் இருக்க வேண்டும். முடிவுகள் முழுமையாக அறிவிக்கப்படும் வரை கவனமாக இருங்கள்." என்றார்.

வெற்றி பெற்ற வேட்பாளர்களை உடனடியாகப் பனையூர் வரச் சொன்னதன் மூலம், மற்ற பெரிய கட்சிகளின் குதிரை பேர முயற்சிகளுக்கோ அல்லது கட்சித் தாவல் நெருக்கடிகளுக்கோ இடம் கொடுக்கக்கூடாது என்பதில் விஜய் உறுதியாக இருப்பதை இச்சந்திப்பு உணர்த்துகிறது. சட்டமன்றத் தேர்தல் முடிவுகள் வெளியாக உள்ள நிலையில், விஜய்யின் இந்த 'கட்டளை' த.வெ.க. வட்டாரத்தில் பெரும் பரபரப்பை ஏற்படுத்தியுள்ளது.