ரீல்ஸ் நல்லா போடுறீங்க... கல்வியே மிக முக்கியம் - இன்ஸ்டா சிறுவர்களுக்கு முதல்வர் அறிவுரை!

இன்ஸ்டாகிராம் பக்கத்தில் நகைச்சுவையான வீடியோக்கள் மூலம் பிரபலமடைந்த சிறுவர்களை நேரில் அழைத்து பாராட்டிய முதலமைச்சர் மு.க.ஸ்டாலின், கல்வியின் முக்கியத்துவம் குறித்து அவர்களுக்கு அன்பான அறிவுரைகளை வழங்கினார்.

சமூக வலைதளங்களில் தங்களின் எதார்த்தமான பேச்சு மற்றும் நகைச்சுவையான ரீல்ஸ் (Reels) வீடியோக்கள் மூலம் மக்கள் மத்தியில் பெரும் வரவேற்பைப் பெற்றவர்கள் தேவா மற்றும் ஜீவா ஆகிய சிறுவர்கள். இவர்களின் வீடியோக்கள் லட்சக்கணக்கான பார்வைகளைப் பெற்று வைரலாகி வருகின்றன.

இந்தச் சிறுவர்களின் திறமையை அறிந்த முதலமைச்சர் மு.க.ஸ்டாலின், அவர்களை நேரில் அழைத்துச் சந்தித்தார். அப்போது, தானும் அவர்களின் வீடியோக்களைப் பார்ப்பதாகக் குறிப்பிட்ட முதல்வர், அவர்களின் படைப்பாற்றலையும் (Creativity) வெளிப்படுத்தும் திறனையும் வெகுவாகப் பாராட்டினார்.

பொழுதுபோக்கு ஒருபுறம் இருந்தாலும், மாணவர்களுக்குக் கல்வியே மிக முக்கியம் என்பதை முதல்வர் இந்தச் சந்திப்பின் போது வலியுறுத்தினார். சிறுவர்களிடம் உரையாடிய அவர், "ரீல்ஸ் நல்லா போடுறீங்க தம்பி... அதேபோல நல்லா படிக்கவும் செய்யணும்" என்று அன்போடு அறிவுரை வழங்கினார். முதல்வரின் இந்தப் பாராட்டும், மாணவர்களுக்கான அவரது வழிகாட்டலும் தற்போது சமூக வலைதளங்களில் பலரின் கவனத்தைப் பெற்று வருகிறது.