தவெக-வில் பெண்களுக்கு அங்கீகாரம் இல்லை : திமுக-வில் இணைந்த அஜிதா ஆக்னல் பேட்டி!

தமிழக வெற்றி கழகத்தின் தூத்துக்குடி மாவட்ட முக்கிய நிர்வாகியாக இருந்த அஜிதா ஆக்னல், அக்கட்சியிலிருந்து விலகி இன்று திமுகவில் இணைந்தார்.

தூத்துக்குடி நாடாளுமன்ற உறுப்பினரும், திமுக துணைப் பொதுச்செயலாளருமான கனிமொழி கருணாநிதி முன்னிலையில், அஜிதா ஆக்னல் தனது ஆதரவாளர்களுடன் திமுகவில் தன்னை இணைத்துக் கொண்டார். திமுகவில் இணைந்த பிறகு செய்தியாளர்களைச் சந்தித்த அஜிதா ஆக்னல் கூறியதாவது: "நாடாளுமன்ற உறுப்பினர் கனிமொழி மற்றும் அமைச்சர்கள் முன்னிலையில் இன்று திமுகவில் இணைந்துள்ளேன். தமிழக வெற்றி கழகத்தில் பெண்களுக்கு உரிய அங்கீகாரமும், மதிப்பும் இல்லாத காரணத்தால் அந்த அமைப்பிலிருந்து விலகி, தற்போது திமுகவில் சேர்ந்துள்ளேன்" என்று தெரிவித்தார்.

இந்நிகழ்ச்சியில் தமிழக மீன்வளத்துறை அமைச்சர் அனிதா ராதாகிருஷ்ணன், மாநிலங்களவை உறுப்பினர் கான்ஸ்டண்டன் ரவீந்திரன், சட்டமன்ற உறுப்பினர்கள் மார்க்கண்டேயன் (விளாத்திகுளம்), சண்முகையா (ஓட்டப்பிடாரம்), மாநில வர்த்தக அணி இணைச் செயலாளர் உமரி சங்கர் மற்றும் ஜெகன் உள்ளிட்ட நிர்வாகிகள் கலந்துகொண்டனர். தேர்தல் நேரத்தில் தமிழக வெற்றி கழகத்தின் மாவட்டப் பொறுப்பாளராக இருந்தவர் விலகி திமுகவில் இணைந்துள்ளது அரசியல் வட்டாரத்தில் சலசலப்பை ஏற்படுத்தியுள்ளது.