தூத்துக்குடி விமான நிலைய ஆலோசனைக் குழுக் கூட்டம்: மேம்பாட்டுப் பணிகள் குறித்து கனிமொழி எம்.பி. ஆய்வு

தூத்துக்குடி விமான நிலைய மேம்பாட்டுப் பணிகள் குறித்து கனிமொழி எம்.பி. தலைமையில் ஆலோசனைக் குழுக் கூட்டம் நடைபெற்றது.

தூத்துக்குடி விமான நிலைய ஆலோசனைக் குழுக் கூட்டம் விமான நிலைய வளாகத்தில் நடைபெற்றது. இக்கூட்டத்திற்கு ஆலோசனைக் குழுவின் தலைவரான கனிமொழி எம்.பி தலைமை தாங்கினார். இதில் மாவட்ட ஆட்சியர் இளம்பகவத், சண்முகையா எம்.எல்.ஏ, மாவட்ட காவல் கண்காணிப்பாளர் (எஸ்பி) மதன், மாநகராட்சி ஆணையாளர் பிரியங்கா மற்றும் விமான நிலைய இயக்குநர் அனூப் ஆகியோர் கலந்துகொண்டனர்.

கூட்டத்தில் விமான நிலையத்தில் தற்போது நடைபெற்று வரும் பல்வேறு மேம்பாட்டுப் பணிகள், புதிய விமானச் சேவைகளைத் தொடங்குவதற்கான முயற்சிகள் மற்றும் எடுக்கப்பட்டுள்ள நடவடிக்கைகள் குறித்து விமான நிலைய அதிகாரிகள் விரிவாக எடுத்துரைத்தனர். பின்னர், விமான நிலைய மேம்பாடு, பயணிகளுக்கான கூடுதல் வசதிகள் மற்றும் புதிய வழித்தடங்களில் விமானச் சேவைத் தொடங்குவது தொடர்பாக ஆலோசனைக் குழு உறுப்பினர்கள் பல்வேறு ஆலோசனைகளை வழங்கினர்.

முன்னதாக தூத்துக்குடி மாவட்ட மாற்றுத்திறனாளிகள் நலத்துறை சார்பில், மாற்றுத்திறனாளிகளுக்கான இணைப்புச் சக்கரம் பொருத்தப்பட்ட பெட்ரோல் ஸ்கூட்டர்கள் வழங்கும் விழா தூத்துக்குடி மாவட்ட ஆட்சியர் அலுவலகத்தில் மாவட்ட ஆட்சியர் இளம்பகவத் தலைமையில் நடைபெற்றது. 

சமூகநலம் மற்றும் மகளிர் உரிமைத் துறை அமைச்சர் கீதா ஜீவன், தூத்துக்குடி மாநகராட்சி மேயர் ஜெகன் பெரியசாமி, மற்றும் சண்முகையா எம்.எல்.ஏ ஆகியோர் முன்னிலை வகித்தனர். விழாவில் சிறப்பு அழைப்பாளராகக் கலந்துகொண்ட கனிமொழி எம்.பி, 76 மாற்றுத்திறனாளிகளுக்கு ரூ. 77 லட்சத்து 37 ஆயிரம் மதிப்பிலான இணைப்புச் சக்கரம் பொருத்தப்பட்ட பெட்ரோல் ஸ்கூட்டர்களை வழங்கினார். இந்நிகழ்வில் மாவட்ட மாற்றுத்திறனாளிகள் நல அலுவலர் பிரம்மநாயகம் உள்ளிட்டோர் கலந்துகொண்டனர்.