தூத்துக்குடியில் பாஜக-மார்க்சிஸ்ட் கட்சியினர் மோதல் : இரு தரப்பினரும் காவல் நிலையத்தில் புகார்!

தூத்துக்குடியில் பழைய மாநகராட்சி வளாகத்தில் பாஜக - மார்க்சிஸ்ட் கட்சியினர் இடையே ஏற்பட்ட மோதல் தொடர்பாக போலீசார் விசாரணை நடத்தி வருகின்றனர். 

தூத்துக்குடியில் வஉசி பிறந்தநாள் விழாவையொட்டி, பழைய மாநகராட்சி வளாகத்தில் அமைந்துள்ள வஉசி உருவச் சிலைக்கு மாலை அணிவித்து மரியாதை செலுத்துவதற்காக பல்வேறு கட்சியினர், சமூக அமைப்பினர் வந்தனர். அப்போது, பாஜக பிரமுகர்கள், தங்கள் கட்சி மாவட்ட நிர்வாகிகள் வருகைக்காக காத்திருந்தனர்.

அப்போது, மக்கள் ஒற்றுமை பிரசாரப் பயணம் மேற்கொண்ட மார்க்சிஸ்ட் கம்யூனிஸ்ட் கட்சியின் சிஐடியூ, அகில இந்திய விவசாய தொழிலாளர் சங்கத்தினர் வஉசி சிலை முன்பாக தங்கள் பயணத்தை நிறைவு செய்யும் வகையில் பேச்சைத் தொடங்கினர்.

அப்போது, மார்க்சிஸ்ட் மாநிலச் செயலர் ரசல் பேசுகையில், மத்திய அரசையும், பிரதமர் மோடியையும் தரக்குறைவாக பேசுயதாகக் கூறி, பாஜக பிரமுகர் சொக்கலிங்கம், ரசலிடம் இருந்து மைக்கை பிடுங்கினாராம். இதைத் தொடர்ந்து, இரண்டு தரப்புக்கும் இடையே மோதல் ஏற்பட்டு, ஒருவரை ஒருவர் தாக்கிக் கொண்டனர். மேலும், வெகுநேரமாக வாக்குவாதத்தில் ஈடுபட்டனர். 

பாதுகாப்புப் பணிக்காக காவல்துறையினரும் அங்கு இல்லாததால் அந்தப் பகுதியே போர்க்களம் போல் ஆனது. பின்னர், பாஜக மாவட்டத் தலைவர் சித்ராங்கதன், மாநில துணைத் தலைவர் சசிகலா புஷ்பா உள்ளிட்டோரும் அங்கு வந்ததால் விவாதம் மேலும் அதிகமானது. இதையடுத்து, அங்கு வந்த மத்திய பாகம் போலீசார் இரு தரப்பினரிடமும் பேச்சுவார்த்தை நடத்தி அனுப்பி வைத்தனர். தொடர்ந்து, இரு தரப்பினரும் தனித்தனியே மத்திய பாகம் காவல் நிலையத்தில் புகார் அளித்துள்ளனர்.