மாநில ஓவிய போட்டியில் 3வது இடம்: திருச்செந்தூர் பள்ளி மாணவனுக்கு பாராட்டு

ஓவிய போட்டியில் மாநில அளவில் 3ம் இடத்தை பிடித்த திருச்செந்தூர் பள்ளி மாணவருக்கு பாராட்டு விழா நடைபெற்றது. 

திருச்செந்தூர் தெற்கு ரத வீதியில் உள்ள திரு ராமையா பாகவதர் நினைவு நிலை ஸ்ரீசெந்தில் முருகன் நடுநிலைப்பள்ளி மாணவன் ச.ஜெய்ரோ, ஓவிய போட்டியில் மாநில அளவில் 3ம் இடத்தையும், மாவட்ட அளவில் முதல் இடத்தையும் பெற்று பள்ளிக்கு பெருமை சேர்த்துள்ளார். இதையடுத்து மாணவன் ஜெய்ரோவிற்கு பள்ளி நிர்வாக சார்பில் பாராட்டு தெரிவிக்கப்பட்டது. மேலும் தூத்துக்குடி மாவட்ட வாசிப்பு இயக்கம் மற்றும் வஉசி நற்பணி மன்றம் சார்பில், மாணவன் ஜெய்ரோவுக்கு பொன்னாடை அணிவித்து பரிசுகள் வழங்கி பாராட்டு தெரிவிக்கப்பட்டது. 

இந்த நிகழ்ச்சிக்கு வாசிப்பு இயக்க மாவட்ட தலைவர் சந்திரசேகர் தலைமை வகித்தார். வஉசி நற்பணி மன்ற நிறுவனர் இசக்கிமுத்து, வாசிப்பு இயக்க செயலாளரும், நல்நூலகருமான மாதவன், பொருளாளர் ஜெகநாத பெருமாள், ஆலோசகர் முத்துகிருஷ்ணன், முன்னாள் மாணவர் முத்துகிருஷ்ணன் ஆகியோர் முன்னிலை வகித்தனர். பள்ளி தலைமை ஆசிரியை சுபா வரவேற்று பேசினார். இதில் ஆசிரியர்கள், மாணவ, மாணவிகள் கலந்து கொண்டனர். முடிவில் பள்ளி தாளாளர் சுப்பிரமணியன் நன்றி கூறினார்.