நாட்டுப் படகுகளை மீன்வளத் துறையினர் ஆய்வு

தூத்துக்குடி மாவட்டத்தில் உள்ள நாட்டுப் படகுகளை மீன்வளத் துறையினர் ஆய்வு மேற்கொண்டனர்.

தமிழகத்தில் ஆண்டுதோறும் மீன்வளத்துறை சாா்பில் விசைப்படகுகள், நாட்டுப்படகுகள் ஆகியவை கடலில் இயக்குவதற்கு தகுதியானதாக உள்ளதா என ஆய்வு மேற்கொள்வது வழக்கம். அதன்படி கடந்த சில தினங்களுக்கு முன்பு மாவட்டத்தில் உள்ள 551 விசைப்படகுகளை மீன்வளத்துறை அதிகாரிகள் ஆய்வு மேற்கொண்டனர். அதனைத் தொடா்ந்து, நாட்டுப்படகுகள் ஆய்வு மேற்கொள்ளப்பட்டன. 

தூத்துக்குடி மாவட்டத்தில், வேம்பாா் முதல் பெரியதாழை வரை உள்ள மீனவ கிராமங்களில் சுமாா் 4 ஆயிரம் நாட்டுப்படகுகள் உள்ளன. அதன்படி, தூத்துக்குடி மீன்வளத் துறை இணை இயக்குநா் (பொறுப்பு) காசிநாத பாண்டியன் தலைமையில், உதவி இயக்குநா்கள் விஜயராகவன், புஸ்ரா சப்னம், ராதாபுரம் மீன்வளத்துறை உதவி இயக்குநா் ராஜதுரை உள்பட 82 அலுவலா்கள் 41 குழுக்களாகப் பிரிந்து மீனவ கிராமங்களுக்குச் சென்று ஆய்வு மேற்கொண்டனர்.

நாட்டுப்படகின் பதிவு உரிமம், காப்பீடு, டீசல் புத்தகம் உள்ளிட்டவை முறையாக உள்ளதா, பாதுகாப்பு கருவிகள், அவசர கால கருவிகள் உள்ளதா, படகுகள் இயக்குவதற்கு தகுதியானதாக உள்ளதா என்பது குறித்து ஆய்வு செய்யப்பட்டது.