தமிழக தேர்தல் பொறுப்பாளர்களாக நியமனம்: 3 மத்திய அமைச்சர்களை களமிறக்கிய பாஜக!

தமிழக சட்​டப்​பேரவை தேர்​தலுக்கு பியூஷ் கோயல் உட்பட 3 மத்​திய அமைச்​சர்​களை பொறுப்​பாளர்​களாக பாஜக நியமித்​துள்​ளது.

தமி​ழ​கத்தில் அடுத்த ஆண்டு சட்டப்​பேரவை தேர்தல் வரவுள்ளது. இதனால், தமிழக அரசியல் களம் சூடு பிடித்​துள்ளது. தமிழகத்தில் ஆட்சியை பிடிக்க அதிமுக பல்வேறு வியூகங்களை வகுத்து வருகிறது. அதேநேரம் திமுக கூட்டணி பலமாக இருப்​ப​தால், தேர்தலில் திமுகவை தோற்கடிக்க, மெகா கூட்டணியை அமைக்க அதிமுக பொதுச்​செய​லாளர் பழனிசாமி தீவிர முயற்சி எடுத்து வருகி​றார்.

பாஜக, தமாகா மற்றும் சில கட்சிகளுடன் கூட்டணி அமைத்​துள்ள அதிமுக, மேலும் கட்சிகளை சேர்த்து கூட்டணியை பலப்படுத்தும் பணியில் ஈடுபட்டு வருகிறது. அதற்கு பக்கபலமாக கட்சிகளை கூட்ட​ணியில் சேர்க்க, பாஜகவும் தேவையான உதவிகளை செய்து கொண்டிருக்​கிறது. குறிப்பாக, 2021 சட்டப்​பேரவை தேர்தலில் அதிமுக - பாஜக கூட்ட​ணியில் இருந்த கட்சிகளை​யும், திமுக கூட்ட​ணியில் உள்ள சில கட்சிகளையும் கூட்ட​ணியில் சேர்க்கும் பணிகள் நடைபெற்று வருகிறது.

தமிழக சட்டப்​பேரவை தேர்தல் பணிகளில் தீவிர கவனம் செலுத்தி வரும் பாஜக, தமிழக தேர்தல் பொறுப்​பாளர்களை பாஜக தலைமை நியமித்​துள்ளது. இதுதொடர்பாக பாஜக தேசிய பொதுச்​செய​லாளர் அருண் சிங் வெளியிட்ட அறிவிப்​பில், "தமிழக சட்டப்​பேரவை தேர்தலை முன்னிட்டு கட்சியின் தேசியத் தலைவர், தேர்தல் பொறுப்​பாளர் மற்றும் இணை பொறுப்​பாளர்களை நியமித்​துள்​ளார். அதன்படி, மத்திய வர்த்தகம் மற்றும் தொழில்துறை அமைச்சரான பியூஷ் கோயல் தமிழக சட்டப்​பேரவை தேர்தல் பொறுப்​பாளராக நியமிக்​கப்​படு​கி​றார்.

சட்டம் மற்றும் நீதித்துறை (தனிப்​பொறுப்பு) அமைச்சர் மற்றும் நாடாளுமன்ற விவகாரங்கள் துறை இணை அமைச்சர் அர்ஜூன் ராம் மேக்வால், சிவில் விமான போக்கு​வரத்​துத்துறை மற்றும் கூட்டுறவுத்துறை இணை அமைச்சர் முரளிதர் மோஹோல் தேர்தல் இணை பொறுப்​பாளர்களாக நியமிக்​கப்​பட்​டுள்​ளனர். இது உடனடியாக நடைமுறைக்கு வருகிறது” என்று தெரிவித்​துள்​ளார்.

ஏற்கெனவே, கடந்த மாதம் தமிழக சட்டப்​பேரவை தேர்தல் பொறுப்​பாளராக பாஜக தேசிய துணை தலைவர் வைஜயந்த் பாண்டா எம்பி நியமிக்​கப்பட்ட நிலையில், தற்போது மூன்று மத்திய அமைச்​சர்கள் கொண்ட குழுவை புதிய பொறுப்​பாளர்களாக பாஜக அமைத்​திருப்பது குறிப்​பிடத்​தக்கது. பழனிசாமியின் நண்பர் பியூஷ் கோயல் மத்திய அமைச்சர் பியூஷ் கோயல், கடந்த 2019 மக்களவை தேர்தலின் போதும் தமிழக பாஜகவின் தேர்தல் பொறுப்​பாளராக நியமிக்​கப்​பட்​டிருந்​தார்.

தமிழக அரசியல் சூழ்நிலைகளை நன்கு அறிந்தவர் என்பதா​லும், அதிமுக பொதுச்​செய​லாளர் பழனிசாமி​யிடம் நெருங்கி பழகக்​கூடிய நண்பர் என்பதா​லும், பியூஷ் கோயல் மீண்டும் பொறுப்​பாளராக நியமிக்​கப்​பட்​டுள்ளதாக கூறப்​படு​கிறது. 

தமிழகத்தில் அதிமுக - பாஜக கூட்டணியை வலுப்​படுத்த முடிவு செய்துள்ள இந்த குழுவினர், ஓ.பன்​னீர்​செல்வம், டிடிவி. தினகரன் உள்ளிட்​டோரையும் மற்றும் ராமதாஸ் - அன்புமணி இடையே நிலவி வரும் பிரச்சினையை சரிசெய்து, இருவரையும் ஒன்றாக இணைத்து ஒன்றுபட்ட பாமகவை கூட்ட​ணியில் சேர்க்க தேவையான நடவடிக்​கைகளை எடுக்க இருப்பதாக கூறப்​படு​கிறது.

அதேபோல், கடந்த முறை அதிமுக​விடம் 20 தொகுதிகளை பெற்ற பாஜக 4 தொகுதி​களில் வெற்றி பெற்றது. இந்த தேர்தலில் கூடுதல் தொகுதிகளை கேட்க பாஜக முடிவு செய்​துள்ளது. தொகுதி பங்கீடு பேச்​சு​வார்த்தையில் அதி​முக​வுடன் இந்தக் குழு​வினர் ஈடுபடவுள்​ளனர்​.