கர்நாடகாவில் ரூ.275 கோடி போதை பொருள் சிக்கியது: 2 வெளிநாட்டு பெண்கள் கைது

கர்நாடகாவில் ரூ.275 கோடி போதை பொருள் சிக்கிய விவகாரத்தில் 2 வெளிநாட்டு பெண்களை போலீசார் கைது செய்து விசாரணை நடத்தி வருகின்றனர். 

கர்நாடக மாநிலம் மங்களூருவில் போதைப்பொருள் புழக்கம் அதிகரித்து வருகிறது. இதனை தடுக்க போலீசார் தீவிர நடவடிக்கை எடுத்து வருகிறார்கள். இந்த நிலையில் மங்களூருவில் சமீபத்தில் போதைப் பொருள் விற்பனை தொடர்பாக ஒருவரை போலீசார் கைது செய்தனர். இதில் வெளிநாட்டு பெண்கள் பெங்களூருவில் தங்கியிருந்து போதை பொருள் விற்பனையில் ஈடுபடுவதாக அதிர்ச்சி தகவலை தெரிவித்தார்.

இதையடுத்து அவர் ெகாடுத்த தகவலின்பேரில் மங்களூரு குற்றப்பிரிவு போலீசார் பெங்களூரு எலெக்ட்ரானிக் சிட்டி நீலாத்ரி நகர் பகுதியில் உள்ள ஒரு வீட்டில் பதுங்கி இருந்த 2 வெளிநாட்டு பெண்களை கைது செய்தனர். அந்த வீட்டில் அவர்கள் பதுக்கி வைத்திருந்த ரூ.275 கோடி மதிப்புள்ள 37.87 கிலோ எம்.டி.எம்.ஏ. போதைப் பொருள், போதை மாத்திரைகள் பறிமுதல் செய்யப்பட்டது. ஒரே நாளில் இவ்வளவு மதிப்புள்ள போதை பொருள் சிக்கி இருப்பதை கண்டுபோலீசார் அதிர்ச்சி அடைந்தனர்.

இருவரிடம் இருந்து போதைப்பொருட்கள் மட்டுமின்றி 4 செல்போன்கள், ரூ.18 ஆயிரம் ரொக்கம், 2 டிராலி பேக் ஆகியவை பறிமுதல் செய்யப்பட்டுள்ளது. விசாரணையில் போதை பொருள் கடத்தலில் ஈடுபட்ட அந்த பெண்கள் தென் ஆப்பிரிக்கா அக்போவில்லே பகுதியை சேர்ந்த பம்பா பான்டா (31) மற்றும் தென் ஆப்பிரிக்கா பிரிட்டோரியாவை சேர்ந்த அபிகேல் அடோனிஸ் (30) என்பதும் தெரியவந்தது. பம்பா பான்டா தற்போது புதுடெல்லி விபின் கார்டனில் வசித்து வருகிறார். அதுபோல் அபிகேல் அடோனிஸ் புதுடெல்லி மால்வியா நகரில் வசித்து வருகிறார்.

ஒரே இடத்தில் 2 ேபரும் தங்கியிருந்தால் போலீசாரிடம் மாட்டிக் கொள்வோம் என்பதற்காக டெல்லியில் தனித்தனியாக வெவ்வேறு பகுதியில் தங்கி இருந்து போதை பொருள் கடத்தலை 1½ ஆண்டுகளாக நடத்தி வந்து இருக்கிறார்கள். குறிப்பாக கர்நாடக பெங்களூரு, மங்களூரு, டெல்லி உள்பட நாடு முழுவதும் போதை பொருள், போதை மாத்திரை விநியோகம் செய்து இருக்கிறார்கள்.

இது பற்றி நாடு முழுவதும் உள்ள விமான நிலையங்களுக்கு தெரிவிக்கப் பட்டுள்ளது. அவர்கள் வைத்துள்ள பாஸ்போர்ட் மற்றும் விசா உள்ளிட்டவை குறித்து உண்மை தன்மை கண்டறியப்பட்டது. அப்போது விசா மற்றும் பாஸ்போர்ட் போலியானது என தெரிய வந்துள்ளது. பாம்பா பான்டா 2020-ம் ஆண்டு வணிக விசாவில் டெல்லிக்கு வந்து உணவு வண்டி தொழிலை நடத்தி வந்துள்ளார். 2016-ம் ஆண்டு ஜூலை மாதம் மருத்துவ விசாவில் அபிகேல் அடோனிஸ் டெல்லிக்கு வந்து ஆடை வியாபாரம் செய்து வந்தார். கைதான 2 பெண்களிடமும் தீவிர விசாரணை நடத்தப்பட்டு வருகிறது.

அதிக அளவிலான போதைப்பொருட்கள் கண்டுபிடிக்கப்பட்டதை தொடர்ந்து மத்திய போதைப்பொருள் தடுப்பு புலனாய்வு பிரிவு தகவல் தெரிவிக்கப்பட்டு உள்ளது. மத்திய அதிகாரிகளும் பெங்களூருக்கு வந்து கைதான 2 பெண்களிடமும் விசாரணை நடத்த உள்ளனர்.

இது குறித்து மங்களூரு மாநகர போலீஸ் கமிஷனர் அனுபம் அகர்வால் கூறுகையில், கடந்த ஆண்டு மங்களூரு பம்ப்வெல் பகுதியில் போதைப்பொருள் விற்றதாக ஹைதர் அலி மற்றும் பெங்களூருவில் நைஜீரியாவை சேர்ந்த பீட்டர் என்பவரை கைது செய்து எம்.டி.எம்.ஏ. போதைப்பொருளை பறிமுதல் செய்ேதாம். அவர்கள் கொடுத்த தகவலின்பேரில் 2 வெளிநாட்டு பெண்களை கைது செய்துள்ளோம். இவர்களுடன் தொடர்பில் உள்ளவர்கள் யார்-யார் என்பது குறித்து விசாரணை நடத்தி வருகிறோம். என்றனர்.