ஜமாபந்தியில் விவசாயிகளுக்கு தனித்துவ அடையாள எண் வழங்க நடவடிக்கை – ஆட்சியர் தகவல்

தூத்துக்குடி மாவட்டத்தில் ஜூன் 12-ஆம் தேதி வரை நடைபெற உள்ள ஜமாபந்தி கூட்டங்களில் விவசாயிகளுக்கு 'தனித்துவ அடையாள எண்' வழங்கச் சிறப்பு முகாம்களை நடத்தப்பட உள்ளதாக மாவட்ட ஆட்சியர் விஷு மகாஜன் தெரிவித்துள்ளார். 

இது குறித்து மாவட்ட ஆட்சியர் அலுவலகம் வெளியிட்டுள்ள செய்திக்குறிப்பில் "தூத்துக்குடி மாவட்டத்தில் உள்ள 10 தாலுகா அலுவலகங்களிலும் மாவட்ட ஆட்சியரால் நியமிக்கப்பட்டுள்ள சிறப்பு அலுவலர்கள் தலைமையில் ஜமாபந்தி கூட்டங்கள் முறையாக நடத்தப்படும். சென்னை, கூடுதல் தலைமைச் செயலர் மற்றும் வருவாய் நிர்வாக ஆணையரின் நேரடி அறிவுரைப்படி, கள அலுவலர்கள் ஜமாபந்தி காலத்தில் விவசாயிகளுக்கு உரிய வழிமுறைகளை வழங்கி, அவர்களின் நில உடைமைகளைத் துல்லியமாகப் பதிவு செய்யக் கிராமங்கள் தோறும் முகாம்களை நடத்த அறிவுறுத்தப்பட்டுள்ளனர்.

விவசாயிகள் தங்களது நில விபரங்களைப் பதிவு செய்து, வேளாண் துறையின் 'தனித்துவ அடையாள எண்' (FR ID) பெறுவது தற்போது கட்டாயமாக்கப்பட்டுள்ளது. இதன் மூலம், சட்டப்படியான வாரிசுகளுக்குரிய பட்டா மாறுதல் மற்றும் இதர நிலப் பரிவர்த்தனைத் தேவைகளை எவ்வித உள்கட்டமைப்புத் தாமதமும் இன்றி மிக எளிதாக மேற்கொள்ள முடியும். ஜமாபந்தி காலத்தில் நிலுவையில் உள்ள விவசாயிகளின் தரவுகளைச் சரிபார்க்க, உதவி வேளாண்மை அலுவலர்களும் கிராம நிர்வாக அலுவலர்களும் இணைந்து கூட்டுத் தணிக்கை மற்றும் தரவு ஒப்பீட்டுப் பணிகளை மேற்கொள்ளக் கேட்டுக் கொள்ளப்பட்டுள்ளனர்.

தமிழ்நாடு அரசின் சார்பில் மானிய விலையில் வழங்கப்படும் தரமான உரங்கள், விதைகள், வேளாண் இயந்திரங்கள் மற்றும் பல்வேறு உழவர் நலத்திட்டங்களின் பலன்களை நேரடியாகப் பெற வேண்டும் என்றால், விவசாயிகள் இந்தத் 'தனித்துவ அடையாள எண்' (FR ID) வைத்திருப்பது முற்றிலும் கட்டாயமாக்கப்பட்டுள்ளது.

எனவே, நில உடைமை மற்றும் பட்டா தொடர்பான சிக்கல்களினால் இதுவரை இந்த விவசாய அடையாள எண்ணைப் பெறாத உள்ளூர் விவசாயிகள், தத்தமது பகுதிகளில் நடைபெறும் ஜமாபந்தி நிகழ்வில் நேரடியாகக் கலந்துகொண்டு பயன்பெறலாம். அங்குப் பட்டா மாறுதல் மற்றும் இதர நிலப் பரிவர்த்தனைகள் தொடர்பான கோரிக்கைகளுக்கு உத்தியோகப்பூர்வமாக மனு செய்து, அதன் தொடர்ச்சியாகத் தங்களுக்குரிய விவசாய அடையாள எண்ணை விரைந்து பெற்றுக்கொள்ளுமாறு மாவட்ட ஆட்சியர் அறிவுறுத்தியுள்ளார்.

இது தொடர்பான கூடுதல் விபரங்கள் மற்றும் வழிகாட்டுதல்களுக்கு, விவசாயிகள் தங்களின் வட்டார வேளாண்மை மற்றும் தோட்டக்கலை உதவி இயக்குநர் அலுவலகங்கள் அல்லது தத்தமது கிராமங்களுக்குரிய உதவி வேளாண்மை/தோட்டக்கலை அலுவலர்களை நேரில் அணுகிப் பயன்பெறலாம் என மாவட்ட ஆட்சியர் விஷு மகாஜன் செய்திக்குறிப்பில் தெரிவித்துள்ளார்.