அதிக கட்டணம் வசூலித்த 3 மினி பஸ்களுக்கு அபராதம் : 4 பேருந்துகளில் காற்று ஒலிப்பான்கள் பறிமுதல்!

கோவில்பட்டியில் வட்டார போக்குவரத்து அதிகாரிகள் திடீர் சோதனை நடத்தி, அதிக கட்டணம் வசூலித்த 3 மினி பஸ்களுக்கு அபராதம் விதித்து நடவடிக்கை எடுத்தனர்.

கோவில்பட்டியில் மினி பஸ்களில் அரசு நிர்ணயித்த கட்டணத்தை விட அதிக கட்டணம் வசூலிப்பதாக பொதுமக்கள், சமூக ஆர்வலர்கள் தொடர்ந்து புகார் தெரிவித்து வந்தனர். இதன் அடிப்படையில் நேற்று வட்டார போக்குவரத்து அலுவலர் கிரிஜா, மோட்டார் வாகன ஆய்வாளர் பெலிக்ஸன் மாசிலாமணி தலைமையிலான அதிகாரிகள் நேற்று மதியம் அண்ணா பஸ் நிலையம், தீயணைப்பு நிலையம் சந்திப்பு, ரெயில் நிலையம், கடலையூர் ரோடு ஆகிய பகுதிகளில் மினி பஸ்களில் திடீர் சோதனை மேற்கொண்டனர்.

அப்போது மினி பஸ்களில் அரசு நிர்ணயித்த கட்டணத்தை விட அதிகமாக கட்டணம் வசூலித்தது கண்டுபிடிக்கப்பட்டது. இதையடுத்து அதிக கட்டணம் வசூலித்த 3 மினி பஸ்களுக்கு அபராதம் விதித்து அதிகாரிகள் நடவடிக்கை எடுத்தனர். மேலும் பொதுமக்களுக்கு பாதிப்பு ஏற்படும் வகையில் கூடுதல் கட்டண வசூலித்தாலோ அல்லது விதிமுறைகளை மீறினாலோ கடுமையான நடவடிக்கை எடுக்கப்படும் என அதிகாரிகள் எச்சரித்தனர்.

தொடர்ந்து தனியார் மற்றும் அரசு பஸ்களில் சோதனை மேற்கொண்டனர். இதில் 4 பஸ்களில் அதிக ஒலி எழுப்பும் ஏர்ஹாரன் பொருத்தப்பட்டிருந்தது கண்டுபிடிக்கப்பட்டது. அந்த ஏர்ஹாரன்களை பஸ்களில் இருந்து அகற்றி அதிகாரிகள் நடவடிக்கை எடுத்தனர்.