கோடை வெயில்: நெல்லை அணைகளின் நீர்மட்டம் சரிவு – 52 மெகாவாட் மின் உற்பத்தி நிறுத்தம்!

கடும் கோடை வெயில் காரணமாக, திருநெல்வேலி மாவட்டத்தின் முக்கிய அணைகளான காரையார் மற்றும் சேர்வலாறு அணைகளின் நீர்மட்டம் வெகுவாகக் குறைந்துள்ளது. இதன் விளைவாக, இரு அணைகளிலும் நடைபெற்று வந்த மின் உற்பத்தி தற்காலிகமாக நிறுத்தப்பட்டுள்ளது.

தாமிரபரணி ஆற்றின் நீர்ப்பிடிப்புப் பகுதிகளில் போதிய மழையில்லாததாலும், கோடையின் தாக்கத்தாலும் அணைகளுக்கு வரும் நீரின் அளவு சரிந்துள்ளது. இதனால் காரையார் மற்றும் சேர்வலாறு அணைகளில் இருந்து உற்பத்தி செய்யப்பட்டு வந்த 52 மெகாவாட் மின்சார உற்பத்தி முற்றிலும் முடக்கப்பட்டுள்ளது. நீர்மட்டம் குறைந்ததால், மின் உற்பத்தி நிலையங்களுக்குத் தண்ணீர் கொண்டு செல்லும் குழாய்கள் மற்றும் எந்திரங்களை இயக்க முடியாத சூழல் ஏற்பட்டுள்ளது.

மின் உற்பத்தி நிறுத்தப்பட்டது குறித்து மின்வாரிய அதிகாரிகள் கூறுகையில்: "தற்போது மின் உற்பத்தி நிறுத்தப்பட்டிருந்தாலும், கடந்த காலங்களில் (மழைக்காலங்களில்) இந்த அணைகளில் இருந்து இலக்கை விடக் கூடுதலாக மின்சாரம் உற்பத்தி செய்யப்பட்டுள்ளது. எனவே, தற்போது ஏற்பட்டுள்ள இந்தத் தற்காலிக நிறுத்தம் மின் விநியோகத்தில் பெரிய அளவிலான பாதிப்புகளை ஏற்படுத்தாது. இருப்பினும், கோடை மழை பெய்து அணைகளுக்கு நீர்வரத்து அதிகரித்தால் மட்டுமே மீண்டும் மின் உற்பத்தியைத் தொடங்க முடியும் என தெரிவித்துள்ளனர்.