தூத்துக்குடியில் இருந்து சென்னைக்கு விமானத்தில் பறந்த அரசுப் பள்ளி மாணவர்கள்!

கொம்மடிக்கோட்டை அரசு மாதிரி மேல்நிலைப்பள்ளியில் படித்துப் பொதுத்தேர்வு மற்றும் திறனாய்வுத் தேர்வுகளில் சாதனை படைத்த மாணவ, மாணவிகளைப் பாராட்டும் விதமாக, அப்பள்ளியின் முன்னாள் மாணவர்கள் சங்கம் அவர்களைச் சென்னைக்கு விமானத்தில் இலவசமாகச் சுற்றுலா அழைத்துச் சென்று அசத்தியுள்ளது.

தூத்துக்குடி மாவட்டம் சாத்தான்குளம் அருகேயுள்ள கொம்மடிக்கோட்டை சு. சந்தோச நாடார் அரசு மாதிரி மேல்நிலைப்பள்ளியில் கடந்த கல்வியாண்டில் 10 மற்றும் 12ஆம் வகுப்பு பொதுத்தேர்வில் முதல் மூன்று இடங்களைப் பிடித்த மாணவ, மாணவிகள், தேசிய திறனாய்வுத் தேர்வு (NMMS) மற்றும் முதலமைச்சர் திறனாய்வுத் தேர்வுகளில் வெற்றி பெற்ற சாதனையாளர்கள் இந்தச் சுற்றுலாவிற்குத் தேர்வு செய்யப்பட்டனர்.

இம்மாணவர்களை ஊக்குவிக்கும் பொருட்டு, பள்ளியின் முன்னாள் மாணவர்கள் சங்கத்தின் சார்பில் ஒரு நாள் சென்னைச் சுற்றுலாவிற்கு ஏற்பாடு செய்யப்பட்டது. மாணவர்கள் அனைவரும் தூத்துக்குடி வாகைகுளம் விமான நிலையத்திலிருந்து சென்னைக்கு விமானம் மூலம் அழைத்துச் செல்லப்பட்டனர். சென்னை வந்தடைந்த மாணவர்களை, கொம்மடிக்கோட்டை அரசுப் பள்ளி அமைவதற்குத் தங்களது சொந்த நிலத்தை அர்ப்பணித்துக் கொடுத்த கொம்மடிக்கோட்டை கந்தசாமிபாண்டியனின் மகன் சிவானந்த பாண்டியன் நேரில் வந்து அன்போடு வரவேற்றார்.

விமானத்தில் பறந்த உற்சாகத்தில் இருந்த மாணவர்களுக்குச் சென்னையில் உள்ள முக்கிய இடங்களைச் சுற்றிக் காட்டும் வகையில் ஒரு நாள் பயணத் திட்டம் அமைந்திருந்தது: முதன்முறையாகச் சென்னை மெட்ரோ ரயிலில் மாணவர்கள் பயணம் செய்து மகிழ்ந்தனர். அறிவியலைத் நேரில் உணரும் வகையில் கோளரங்கத்தைக் பார்வையிட்டனர். புனித ஜார்ஜ் கோட்டை அருங்காட்சியகம் மற்றும் தமிழக அரசின் இதயப் பகுதியான தலைமைச் செயலகம் ஆகிய இடங்களுக்கு மாணவர்கள் அழைத்துச் செல்லப்பட்டனர்.

மாலையில் உலகப் புகழ்பெற்ற மெரினா கடற்கரையின் அழகைக் கண்டு ரசித்தனர். இந்தச் சுற்றுலாவின் நிறைவாக, சாதனை படைத்த மாணவர்கள் அனைவருக்கும் முன்னாள் மாணவர்கள் சங்கத்தின் சார்பில் கேடயங்கள் மற்றும் சிறப்பு நினைவுப் பரிசுகள் வழங்கி கௌரவிக்கப்பட்டனர்.

அரசுப் பள்ளி மாணவர்களின் இந்த மறக்க முடியாத கல்விச் சுற்றுலாவை, முன்னாள் மாணவர்கள் சங்கத் தலைவர் முருகானந்தம், செயலாளர் தில்லை மகேந்திரன், பொருளாளர் இனிகோ, முன்னாள் ஆசிரியர் செல்வராஜ் மற்றும் நிர்வாகிகள் ஆனந்த், ஐயப்பன், ஈஸ்வரி, காசிபழம் உள்ளிட்ட பள்ளியின் ஆசிரியர்கள் இணைந்து மிகச் சிறப்பாக ஏற்பாடு செய்திருந்தனர்.