போர்ச்சுகலுக்கு அதிர்ச்சி கொடுத்த காங்கோ: நடுகளத்தில் மிரட்டிய சாமுவேல் முத்துசாமி!

உலகக் கோப்பை கால்பந்து 2026 தொடரில் நேற்று (ஜூன் 18) நடைபெற்ற விறுவிறுப்பான லீக் ஆட்டத்தில், பலம் வாய்ந்த போர்ச்சுகல் அணிக்குக் கடுமையான நெருக்கடி கொடுத்துக் காங்கோ குடியரசு அணி போட்டியைச் சமனில் முடித்து வரலாற்றுச் சாதனை படைத்துள்ளது.

கால்பந்து உலகின் முன்னணி அணிகளில் ஒன்றான போர்ச்சுகல் அணியை எதிர்த்து, நேற்று காங்கோ அணி களம் கண்டது. ஆட்டத்தின் தொடக்கம் முதலே அதிரடி காட்டிய காங்கோ வீரர்கள், போர்ச்சுகல் அணியின் பலமான தடுப்பாட்டங்களை உடைத்து முன்னேறினர். 1974 ஆம் ஆண்டுக்குப் பிறகு நீண்ட இடைவெளிக்குக் பின் உலகக் கோப்பைத் தொடருக்குத் தகுதி பெற்றுள்ள காங்கோ அணி, இந்த ஆட்டத்தில் தனது உலகக் கோப்பை வரலாற்றின் முதல் கோலை பதிவு செய்து அசத்தியது.

இந்த வரலாற்றுச் சிறப்புமிக்க போட்டியில் காங்கோ அணியின் நடுகள வீரராக (Midfielder) தமிழ் வம்சாவளியைச் சேர்ந்த சாமுவேல் முத்துசாமி களம் கண்டார். ஆட்டத்தின் போக்கைத் தீர்மானிக்கும் முக்கியப் பொறுப்பில் இருந்த இவர், போர்ச்சுகல் அணியின் நட்சத்திர வீரர்களின் கோல் அடிக்கும் முயற்சிகளைத் நடுகளத்திலேயே மிகச் சிறப்பாகத் தடுத்து நிறுத்தினார். இவரது துல்லியமான பந்துப் பரிமாற்றங்களும், தடுப்பாட்டமும் காங்கோ அணி போட்டியைச் சமன் செய்ய முக்கியக் காரணமாக அமைந்தது.

போட்டியின் இறுதிவரை இரு அணிகளும் தலா ஒரு கோல் அடித்து சமநிலை வகித்ததால் ஆட்டம் 'டிரா'வில் முடிந்தது. பலம் வாய்ந்த போர்ச்சுகல் அணியை வெல்ல விடாமல் தடுத்து, உலகக் கோப்பையில் தனது முதல் புள்ளியையும், முதல் கோலையும் கணக்கில் பதித்துள்ள காங்கோ அணி, உலகக் கோப்பை கால்பந்து வரலாற்றில் தனக்கென ஒரு முக்கிய மைல்கல்லை எட்டியுள்ளது.