» செய்திகள் - விளையாட்டு » தமிழகம்
அடிதடி, திருட்டு வழிப்பறியில் ஈடுபட்டவர் குண்டர் தடுப்புச் சட்டத்தின் கீழ் கைது!
வியாழன் 11, ஏப்ரல் 2024 8:18:18 PM (IST)
நெல்லையில் கொலை முயற்சி, அடிதடி, திருட்டு மற்றும் வழிப்பறியில் ஈடுபட்டவர் குண்டர் தடுப்புச்சட்டத்தின் கீழ் கைது செய்யப்பட்டார்.
நெல்லை மாவட்டம், கங்கைகொண்டான் காவல் நிலைய சரகத்திற்குட்பட்ட பகுதியில் அடிதடி, கொலை முயற்சி மற்றும் வழிப்பறி வழக்கில் ஈடுபட்ட அனைத்தலையூர், நடுத்தெருவை சேர்ந்த ஆறுமுகம் மகன் சின்ன உய்க்காட்டான் (52) என்பவர் கைது செய்யப்பட்டு சிறையில் அடைக்கப்பட்டுள்ளார். இவர் மீது கொலை முயற்சி, அடிதடி, திருட்டு மற்றும் வழிப்பறி போன்ற பல்வேறு வழக்குகள் உள்ளது.
பொதுமக்களை அச்சுறுத்தி வருவதாக கங்கைகொண்டான் காவல் ஆய்வாளர் வேல்கனி கவனத்திற்கு வந்ததால், அவரை குண்டர் தடுப்பு சட்டம் பிரிவு 14 யின் கீழ் நடவடிக்கை எடுக்க மாவட்ட காவல் கண்காணிப்பாளர் சிலம்பரசன் பரிந்துரையின் பேரில், மாவட்ட ஆட்சித் தலைவர் கார்த்திகேயன் உத்தரவின் பேரில், குண்டர் தடுப்பு சட்டத்தின் கீழ் பாளை மத்திய சிறையில் இன்று அடைக்கப்பட்டார்.