தூத்துக்குடி துப்பாக்கிச்சூடு வழக்கு: சிபிஐ விசாரணை தாமதம் ஏன்? – உயர் நீதிமன்றம் கேள்வி!

தூத்துக்குடி துப்பாக்கிச்சூடு சம்பவத்தில் சிபிஐ விசாரணை தாமதம் அடைவது ஏன் என்றும், ஒரே ஒரு ஆய்வாளர் மட்டும் தானாகவே துப்பாக்கியை எடுத்துச் சுட்டாரா என்றும் கேள்விகளை எழுப்பியுள்ள உயர் நீதிமன்ற மதுரைக் கிளை, இது குறித்துத் தமிழக அரசு மற்றும் சிபிஐ பதில் மனுத் தாக்கல் செய்ய உத்தரவிட்டுள்ளது.

தூத்துக்குடி துப்பாக்கிச்சூடு சம்பவம் தொடர்பான வழக்கு விசாரணை உயர் நீதிமன்ற மதுரைக் கிளையில் நடைபெற்றது. அப்போது வழக்கை விசாரித்த நீதிபதிகள், "தூத்துக்குடி துப்பாக்கிச்சூடு சம்பவத்தைத் தனி விசாரணை அமைப்பிடம் ஒப்படைக்கும் எண்ணம் உள்ளதா? சிபிஐ விசாரணை இவ்வளவு தாமதம் அடைவது ஏன்? மேல் அதிகாரிகளின் எந்த உத்தரவும் இல்லாமல் ஒரே ஒரு ஆய்வாளர் மட்டும் தானாகவே துப்பாக்கியை எடுத்து 16 பேரையும் சுட்டாரா? இச்சம்பவத்தில் உயிரிழந்தவர்களின் குடும்பத்தினருக்கு இழப்பீட்டுத் தொகையை உயர்த்தி வழங்க முடிவு செய்யப்பட்டுள்ளதா?" என்று பல கேள்விகளைச் சரமாரியாக எழுப்பினர்.

மேலும், இக்கேள்விகள் குறித்துத் தமிழக அரசும் மத்திய புலனாய்வு அமைப்பும் (சிபிஐ) விரிவான பதில் மனுத் தாக்கல் செய்ய வேண்டும் என உத்தரவிட்டு வழக்கின் விசாரணையை ஒத்திவைத்தனர்.