கார்பன் கிரெடிட் திட்டம்: வ.உ.சி. துறைமுகத்திற்கு ரூ.50 கோடி கூடுதல் வருவாய் ஈட்ட இலக்கு!

தூத்துக்குடி வ.உ.சிதம்பரனார் துறைமுக ஆணையம், கார்பன் கிரெடிட் திட்டத்தின் மூலம் அடுத்த 10 ஆண்டுகளில் ரூ. 50 கோடி கூடுதல் வருவாய் ஈட்டத் திட்டமிட்டுள்ளது.

இதுகுறித்து துறைமுக ஆணையத் தலைவர் சுசாந்த குமார் புரோகித் வெளியிட்டுள்ள செய்திக்குறிப்பில் கூறியிருப்பதாவது: வ.உ.சி. துறைமுக ஆணையம் தனது புதுப்பிக்கத்தக்க ஆற்றல் திட்டங்களிலிருந்து கார்பன் கிரெடிட்டுகளை உருவாக்கும் பணியை அதிகாரப்பூர்வமாகத் தொடங்கியுள்ளது. இத்திட்டத்தின் மூலம், சுற்றுச்சூழலுக்குப் பாதிப்பில்லாத வகையில் உற்பத்தி செய்யப்படும் உபரி மின்சாரத்தை விற்பனை செய்து, துறைமுகத்திற்குப் கூடுதல் வருவாய் ஈட்டப்படும்.

துறைமுகம் தற்போது 12.4 மெகாவாட் மொத்த உற்பத்தித் திறன் கொண்ட 5 முக்கிய புதுப்பிக்கத்தக்க ஆற்றல் திட்டங்களைப் பதிவு செய்துள்ளது. அந்தத் திட்டங்களின் விவரம்:

400 கிலோவாட் திறன் கொண்ட மேற்கூரை சூரிய மின்சக்தி அமைப்பு.

1 மெகாவாட் மற்றும் 2 மெகாவாட் திறன் கொண்ட தரைத்தள சூரிய மின் நிலையங்கள்.

6.3 மெகாவாட் மற்றும் 2.7 மெகாவாட் திறன் கொண்ட காற்றாலை மின் திட்டங்கள்.

அடுத்த 10 ஆண்டுகளில், இந்த பசுமைத் திட்டங்கள் மூலம் சுமார் 19,483 கார்பன் கிரெடிட்கள் உருவாகும் என்று கணிக்கப்பட்டுள்ளது. தற்போதைய சர்வதேச சந்தை நிலவரப்படி, இதன் மூலம் வ.உ.சி. துறைமுகத்திற்கு சுமார் ரூ. 50 கோடி கூடுதல் வருவாய் கிடைக்கும் என்று எதிர்பார்க்கப்படுகிறது.

உலகளாவிய கார்பன் சந்தைகளைத் திறம்படப் பயன்படுத்துவதன் மூலம், சுற்றுச்சூழல் முதலீடுகளில் உள்ள அபாயங்களைக் குறைத்து, லாபம் ஈட்டும் முன்னோடித் துறைமுகமாக வ.உ.சி. துறைமுகம் தன்னை நிலைநிறுத்திக் கொள்ளும்.

"சுற்றுச்சூழல் பொறுப்புணர்வும், பொருளாதார நிலைத்தன்மையும் ஒன்றுக்கொன்று முரணானவை அல்ல; மாறாக, அவை ஒன்றையொன்று வலுப்படுத்துபவை. கார்பன் தடயத்தைக் குறைப்பதோடு மட்டுமல்லாமல், நிலையான கடல்சார் செயல்பாடுகளுக்கான ஒரு மேம்பட்ட நிதி மாதிரியைத் துறைமுகம் உருவாக்கி வருகிறது," என்று சுசாந்த குமார் புரோகித் அந்த அறிக்கையில் குறிப்பிட்டுள்ளார்.