தூத்துக்குடி மாவட்டத்தில் 21 வேட்புமனுக்கள் தாக்கல் : ஆட்சியர் தகவல்!

திருச்செந்தூர் தொகுதியில் திமுக வேட்பாளரும் அமைச்சருமான அனிதா ஆர். ராதாகிருஷ்ணன் உட்பட தூத்துக்குடி மாவட்டத்தில் நேற்று ஒரே நாளில் 21 வேட்பு மனுக்கள் தாக்கல் செய்யப்பட்டுள்ளன. 

தமிழகச் சட்டமன்றப் பொதுத்தேர்தல் 2026-க்கான அறிவிக்கை வெளியிடப்பட்டதைத் தொடர்ந்து, தூத்துக்குடி மாவட்டத்தில் உள்ள 6 சட்டமன்றத் தொகுதிகளிலும் நேற்று (30.03.2026) வேட்புமனுத் தாக்கல் அதிகாரப்பூர்வமாகத் தொடங்கியது. மனுத்தாக்கல் குறித்து மாவட்ட தேர்தல் அலுவலரும், மாவட்ட ஆட்சித்தலைவருமான க. இளம்பகவத்,  வெளியிட்டுள்ள அறிக்கையில், முதல் நாளான நேற்று காலை 11 மணி முதல் மதியம் 3 மணி வரை மொத்தம் 21 வேட்புமனுக்கள் பெறப்பட்டுள்ளதாகத் தெரிவித்துள்ளார்.

திருச்செந்தூர் தொகுதியில் அதிகபட்சமாக 6 மனுக்கள் தாக்கல் செய்யப்பட்டுள்ளன (5 ஆண்கள், 1 பெண்). இதில் திமுக வேட்பாளரும் அமைச்சருமான அனிதா ஆர். ராதாகிருஷ்ணன் மனுத் தாக்கல் செய்திருப்பது குறிப்பிடத்தக்கது. அதனைத் தொடர்ந்து கோவில்பட்டி தொகுதியில் 4 மனுக்களும், விளாத்திகுளம், தூத்துக்குடி மற்றும் ஸ்ரீவைகுண்டம் ஆகிய மூன்று தொகுதிகளில் தலா 3 மனுக்களும் தாக்கல் செய்யப்பட்டுள்ளன. ஒட்டப்பிடாரம் (தனி) தொகுதியில் மட்டும் குறைந்தபட்சமாக 2 மனுக்கள் பெறப்பட்டுள்ளன.

இன்று (31.03.2026) மற்றும் நாளை (01.04.2026) ஆகிய இரண்டு தினங்கள் அரசு விடுமுறை என்பதால், வேட்புமனுக்கள் பெறப்படமாட்டாது. மீண்டும் வரும் ஏப்ரல் 2-ஆம் தேதி (வியாழக்கிழமை) முதல் வேட்பாளர்கள் தங்கள் மனுக்களைத் தாக்கல் செய்யலாம் என மாவட்ட நிர்வாகம் அறிவித்துள்ளது.தேர்தல் அமைதியாகவும், சுமுகமாகவும் நடைபெற அரசியல் கட்சியினரும் பொதுமக்களும் முழு ஒத்துழைப்பு நல்க வேண்டும் என மாவட்ட ஆட்சித்தலைவர் கேட்டுக்கொண்டுள்ளார்.