கோவில்பட்டி நகராட்சிப் பள்ளியில் ரூ.1.44 கோடியில் புதிய வகுப்பறைகள் திறப்பு

கோவில்பட்டியில் பங்களாத் தெருவில் உள்ள நகராட்சி தொடக்கப் பள்ளியில் புதிய வகுப்பறைக் கட்டடத் திறப்பு விழா நடைபெற்றது.

தூத்துக்குடி மாவட்டம், கோவில்பட்டியில் பங்களாத் தெருவில் உள்ள நகராட்சி தொடக்கப் பள்ளியில் (ஆங்கிலவழிக் கல்வி) பள்ளி மேம்பாட்டு நிதி - உள்கட்டமைப்பு பணி திட்டத்தின்கீழ் ரூ. 82 லட்சத்தில் தரைதளத்தில் 5, பள்ளி மேம்பாட்டு நிதி - இயக்குதல், பராமரிப்புப் பணி திட்டத்தின்கீழ் ரூ. 62 லட்சத்தில் முதல் தளத்தில் 3 என மொத்தம் 8 புதிய வகுப்பறைக் கட்டடங்கள் கட்டப்பட்டுள்ளன. விழாவுக்கு, நகர்மன்றத் தலைவர் கா. கருணாநிதி தலைமை வகித்தார். 

சார் ஆட்சியர் {ஹமான்சு மங்கள் முன்னிலை வகித்தார். சமூக நலன்-மகளிர் உரிமைத் துறை அமைச்சர் பி. கீதா ஜீவன் புதிய வகுப்பறைக் கட்டடம், கல்வெட்டைத் திறந்துவைத்து குத்துவிளக்கேற்றினார். நகர்மன்ற உறுப்பினர்கள் முத்துலட்சுமி, உலகராணி, ராமர், ஏஞ்சலா, சுரேஷ், தலைமையாசிரியை ராஜசரஸ்வதி, உட்பட பலர் கலந்து கொண்டனர். தொடர்ந்து, அதே தெருவிலும், அரசு கலை-அறிவியல் கல்லூரியிலும் உள்ள வாக்குச்சாவடி மையங்களில் நடைபெற்ற வாக்காளர் பட்டியல் சிறப்பு தீவிர திருத்தப் பணி முகாம்களை அமைச்சர் ஆய்வு செய்தார்.