தண்டவாளத்தை கடக்க முயன்ற போது ரயில் மோதி டீ மாஸ்டர் பலி!

கோவில்பட்டியில் தண்டவாளத்தை கடக்க முயன்ற போது ரயில் மோதி டீ மாஸ்டர் உயிரிழந்தார். 

தூத்துக்குடி மாவட்டம், கோவில்பட்டி ரயில் நிலையத்திற்கும் - இளையரசனேந்தல் சுரங்கப்பாதையின் ரயில்வே தண்டவாளத்திற்கும் இடைப்பட்ட இடத்தில் நேற்று முதியவர் சடலம் கிடப்பதாக தூத்துக்குடி ரயில்வே போலீசாக்கு தகவல் கிடைத்ததாம். இதையடுத்து போலீசார் சடலத்தை கைப்பற்றி கோவில்பட்டி அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

விசாரணையில், எட்டயபுரம் வட்டம் , கருப்பூர் என்.சுப்பலாபுரம் தெற்கு தெருவைச் சேர்ந்த வேல் மகன் ரத்தினவேல் (60) என்பதும், சிந்தலக்கரையில் உள்ள ஹோட்டலில் டீ மாஸ்டராக வேலை பார்த்து வந்த இவர், கோவில்பட்டி சீனிவாச நகரில் உள்ள தனது மகள் வீட்டிற்கு செல்ல தண்டவாளத்தை கடக்க முயன்றபோது ரயிலில் அடிபட்டு இறந்ததும் தெரியவந்தது. இதுகுறித்து ரயில்வே போலீசார் வழக்குப் பதிந்து விசாரணை நடத்தி வருகின்றனர்.