தொடர் கனமழையால் குடியிருப்புகளை வெள்ளம் சூழ்ந்தது : தூத்துக்குடியில் மக்கள் அவதி!

தூத்துக்குடியில் தொடர் கனமழையால் குடியிருப்புகளை வெள்ளம் சூழ்ந்துள்ளது. 

தமிழகத்தில் வடகிழக்கு பருவமழை தீவிரமாக பெய்து வருகிறது. தூத்துக்குடி மாவட்டத்தில் கடந்த சில தினங்களாக பலத்த மழை பெய்து வருகிறது. தூத்துக்குடி 3வது மைல் அருகே உள்ள திருவிக நகரில் நேற்று இரவு பெய்த கனமழை காரணமாக தண்ணீர் பெருக்கெடுத்து ஓடுகிறது இதனால் பொதுமக்கள் வீட்டை விட்டு வெளியேற முடியாத நிலைமை ஏற்பட்டுள்ளது.

தீபாவளி பண்டிகையான இன்று தண்ணீர் முட்டளவு தேங்கியுள்ளதால் அப்பகுதி மக்கள் அவதி அடைந்துள்ளனர். இது போல் தபால் தந்தி காலனி, கதிர்வேல் நகர் உள்ளிட்ட மாநகர பகுதியில் தாழ்வான இடங்களில் குளம் போல் மழைநீர் தேங்கியது. மழைவெள்ளம் வடியாததால் பொதுமக்கள் அவதியடைந்துள்ளனர். தொடர் மழை காரணமாக பல்வேறு பகுதிகளில் சாலைகள் அரிக்கப்பட்டு குண்டும், குழியுமாக காட்சி அளிக்கின்றன. இதனால் வாகன ஓட்டிகள் சிரமப்பட்டு வருகின்றனர்.