புகையிலைப் பொருள்கள் கடத்திய 4 பேர் கைது : கார், பைக் பறிமுதல்

கோவில்பட்டியில் தடை செய்யப்பட்ட புகையிலை பொருட்கள் வைத்திருந்த 4பேரை போலீசார் கைது செய்து, கார், பைக்கை பறிமுதல் செய்தனர். 

தூத்துக்குடி மாவட்டம், கோவில்பட்டி அத்தைகொண்டான் பகுதியில் புகையிலைப் பொருள்கள் விற்பனை செய்யப்படுவதாக மேற்கு காவல் நிலையத்திற்கு வந்த தகவலையடுத்து, காவல் உதவி ஆய்வாளர் செந்தில்குமார் தலைமையிலான போலீசார், அப்பகுதியில் ரோந்து பணியில் ஈடுபட்டனர்.

அப்போது, அப்பகுதி அணுகு சாலையில் நம்பர் பிளேட் இல்லாமல் சென்ற காரையும், அதன் பின்னால் வந்த பைக்கையும் நிறுத்தி சோதனையிட்ட போது, அதில் தடை செய்யப்பட்ட புகையிலை பொருள்கள் இருப்பது தெரியவந்தது.

விசாரணையில், கார் ஓட்டுநர் கோவில்பட்டி காந்தி நகர் ஜீவா தெருவைச் சேர்ந்த லட்சுமண பாண்டியன் மகன் குரு ராமச்சந்திரன் (28), காரில் இருந்தவர்கள், வானரமுட்டி நடுத்தெருவைச் சேர்ந்த குருசாமி மகன் மாரிமுத்து (44), விழுப்புரம் மாவட்டம் திருக்கோவிலூர் வடகரை தாயனூர் மாரியம்மன் கோயில் தெருவைச் சேர்ந்த சிராஜிதின் மகன் தம்முல் அன்சாரி (27), பைக் ஓட்டுநர் கோவில்பட்டி நடராஜபுரம் 9ஆவது தெருவைச் சேர்ந்த காளிராஜ் மகன் லட்சுமணன்(19) என்பது தெரியவந்தது.

இதுகுறித்து போலீசார் வழக்குப் பதிந்து, 4 பேரையும் கைது செய்து, சுமார் ரூ.90 ஆயிரம் மதிப்பிலான புகையிலை பொருள்கள், அவற்றை கொண்டு செல்ல பயன்படுத்தப்பட்ட கார், பைக்கையும் பறிமுதல் செய்தனர்.