அரிவாளை காட்டி கொலை மிரட்டல்: 2 போ் கைது

கோவில்பட்டியில் அரிவாளை காட்டி பொதுமக்கள் மற்றும்  போலீசாருக்கு கொலை மிரட்டல் விடுத்ததாக 2பேரை போலீசார் கைது செய்தனர். 

தூத்துக்குடி மாவட்டம், கோவில்பட்டி கிழக்கு காவல் நிலைய ஆய்வாளர் பொன்ராஜ் தலைமையில் போலீசார் புதுக்கிராமம், இலுப்பையூரணி உள்ளிட்ட பல்வேறு பகுதிகளில் ரோந்து பணியில் ஈடுபட்டனர். அப்போது வேலாயுதபுரம் வேளாண்மை பல்கலைக்கழகம் அருகே 2 இளைஞர்கள் அரிவாளுடன் நின்றுகொண்டு பொதுமக்களை மிரட்டுவதாக அவர்களுக்கு தகவல் கிடைத்ததாம்.

அங்கு சென்ற போலீசார், அந்த இளைஞர்களை பிடிக்க முயன்றனராம், அப்போது அவர்கள் கையில் வைத்திருந்த அரிவாளை காட்டி கொலை மிரட்டல் விடுத்தனராம். எனினும், அவர்களை மடக்கி பிடித்து அரிவாளை பறிமுதல் செய்து போலீசார் விசாரித்ததில், வேலாயுதபுரம் 2ஆவது தெருவை சேர்ந்த பாலமுருகன் மகன் ராம்குமார் (20), கருணாநிதி நகர் 3ஆவது தெருவை சேர்ந்த ஆனந்த கிருஷ்ணன் மகன் மாதவன் (20) ஆகியோர் எனத் தெரியவந்தது. அவர்கள் மீது போலீசார் வழக்குப்பதிந்து 2 பேரையும் கைது செய்தனர்.