தூத்துக்குடி சிவன் கோவிலில் வைகாசி விசாகத் திருவிழா

வைகாசி விசாகத் திருவிழாவை முன்னிட்டு தூத்துக்குடி சிவன் கோவிலில் அமைந்துள்ள சுப்பிரமணிய சுவாமிக்கு சிறப்பு பூஜை  நடைபெற்றது. 

முருகப்பெருமானின் நட்சத்திரமான வைகாசி விசாக நட்சத்திரத்தன்று வைகாசி விசாகத் திருவிழா முருகன் ஆலயங்களில் வெகு சிறப்பாக கொண்டாடப்பட்டது. இந்நிலையில் தூத்துக்குடியில் அமைந்துள்ள  பழமையான பாகம் பிரியாள் உடனுறை சங்கர ராமேஸ்வரர் ஆலயத்தில் அமைந்துள்ள சுப்பிரமணிய சுவாமி சன்னதியில் வைகாசி விசாகத் திருவிழா முன்னிட்டு முருகப் பெருமானுக்கு மலர்களால் அலங்காரம் செய்யப்பட்டு சிறப்பு தீபாராதனை நடைபெற்றது.

இதில் ஏராளமான பக்தர்கள் கலந்துகொண்டு முருகப்பெருமானை தரிசனம் செய்தனர். இதைத்தொடர்ந்து முருகப்பெருமான் அலங்கரிக்கப்பட்ட மயில் வாகனத்தில் வள்ளி தெய்வானையுடன் எழுந்தருளி வீதி உலா வந்தார் வீதி உலா வந்த முருகப்பெருமானை ஏராளமான பக்தர்கள் தரிசனம் செய்தனர்

கோவில்பட்டி செண்பகவல்லி அம்மன் உடனுறை பூவனநாத சுவாமி கோவிலில் வைகாசி விசாக திருவிழா கொண்டாடப்பட்டது. இவ்விழாவை முன்னிட்டு காலை 10 மணிக்கு விநாயகர், முருகன், சுவாமி, அம்மன், சண்டிகேஸ்வரர் ஆகிய பஞ்சமூர்த்திகளுக்கு சிறப்பு அபிஷேகம், அலங்கார தீபாராதனை நடந்தது. இரவு 7 மணிக்கு விநாயகர், முருகர், வள்ளி - தெய்வானை, செண்பகவல்லி அம்பாள், பூவனநாத சுவாமி, சண்டீகேஸ்வரர் சப்பரங்களில் எழுந்தருளி வீதி உலா வந்து பக்தர்களுக்கு அருள் பாலித்தனர். இதில், திரளான பக்தர்கள் கலந்து கொண்டு சாமி தரிசனம் செய்தனர்.