ரேஷன் அரிசி கடத்தியவா் குண்டா் சட்டத்தில் கைது

கோவில்பட்டியில் ரேஷன் அரிசி கடத்தலில் கைது செய்யப்பட்டவா், குண்டா் தடுப்புக் காவல் சட்டத்தின்கீழ் சிறையில் அடைக்கப்பட்டாா்.

தமிழ்நாடு குடிமை பொருள் வழங்கல் குற்றப் புலனாய்வுத் துறை விருதுநகா் காவல் ஆய்வாளா் ரேணுகாதேவி, உதவி ஆய்வாளா் காா்த்திகேயன், தலைமைக் காவலா்கள் கந்த சுப்பிரமணியன், பூலையா, நாகராஜன் ஆகியோா் கோவில்பட்டி அருகே உள்ள மூப்பன்பட்டி கண்மாய் அருகே கடந்த மாதம் 25ஆம் தேதி நடத்திய ஆய்வில் 1,500 கிலோ ரேஷன் அரிசியைக் கைப்பற்றினா்.

இது தொடா்பாக கோவில்பட்டியை அடுத்த ஆலம்பட்டி கிருஷ்ணா நகரைச் சோ்ந்த ஐயாச்சாமி மகன் பால மணிகண்டன் என்ற கோட்டூா் மணி (40), திருநெல்வேலி திம்மராஜபுரம் அண்ணா நகா் இசக்கி மகன் சுடலைமணி (44) ஆகிய இருவரையும் போலீஸாா் கைது செய்து, அவா்களிடம் இருந்த ரேஷன் அரிசி, மோட்டாா் சைக்கிள் ஆகியவற்றை பறிமுதல் செய்தனா்.

இந்நிலையில், மதுரை மண்டல குடிமைப் பொருள் வழங்கல் குற்றப் புலனாய்வுத்துறை காவல் கண்காணிப்பாளா் விஜய காா்த்திக் ராஜ் அறிவுறுத்தலில், தூத்துக்குடி குடிமைப் பொருள் வழங்கல் குற்றப் புலனாய்வுத் துறை விருதுநகா் காவல் ஆய்வாளா் ரேணுகாதேவி, பால மணிகண்டன் என்ற கோட்டூா் மணியை குண்டா் தடுப்புக் காவல் சட்டத்தில் சிறையிலடைக்க தூத்துக்குடி ஆட்சியருக்கு பரிந்துரை செய்தாா்.அதன்பேரில், ஆட்சியா் கோ. லட்சுமிபதி பிறப்பித்த உத்தரவின்படி, பாளையங்கோட்டை மத்திய சிறையில் அவா் அடைக்கப்பட்டாா்.