வெள்ளத்தால் பாதிக்கப்பட்ட பகுதிகளில் அமைச்சர் கீதாஜீவன் ஆய்வு: நிவாரணப் பொருட்கள் வழங்கினார்

மிக்ஜாம் புயலால் ஏற்பட்ட வரலாறு காணாத அதி கனமழையால் பாதிக்கப்பட்ட சென்னை மற்றும் புறநகர் பகுதிகளில் ராணுவம் மற்றும் கடற்படையினர் மீட்பு பணியில் தொடர்ந்து ஈடுபடுத்தப்பட்டுள்ளனர். வெள்ளத்தால் பாதிக்கப்பட்ட பகுதிகளை இயல்பு நிலைக்கு கொண்டுவர அரசு இயந்திரம் ஓய்வின்றி பணியாற்றி வருகிறது. தகவல் தொடர்பு துண்டிப்பால் பொதுமக்கள் அவதிக்குள்ளாகியுள்ளனர். 

எனினும், பல பகுதிகளில் லட்சக்கணக்கான மக்கள் பாதிக்கப்பட்டுள்ளனர். இந்நிலையில், தமிழ்நாடு முதலமைச்சரின் கட்டளையை ஏற்று தூத்துக்குடி வடக்கு மாவட்ட திமுக செயலாளரும் சமூகநலன் மற்றும் மகளிர் உரிமைத்துறை அமைச்சருமான கீதாஜீவன் இன்று சென்னை மாநகராட்சி 192வது வார்டை சேர்ந்த நீலாங்கரை பகுதியில் புயலால் பாதிக்கப்பட்ட இடங்களை பார்வையிட்டு நிவாரணப் பொருட்களை வழங்கினார். 

மேலும், சென்னை மாநகராட்சி 186வது வார்டுக்கு உட்பட்ட புழுதிவாக்கம் - ராம் நகர் பகுதியில் உள்ள மக்களுக்கு அமைச்சர் கீதாஜீவன் நிவாரணப் பொருட்களை வழங்கினார். அமைச்சர் சி.வி. கணேசன், சோழிங்கநல்லூர் சட்டமன்ற உறுப்பினர் அரவிந்த் ரமேஷ் தூத்துக்குடி மாநகர திமுக செயலாளர் ஆனந்தசேகரன், கோவில்பட்டி நகர்மன்ற தலைவர் கருணாநிதி, தூத்துக்குடி மாநகராட்சி வடக்கு மண்டல தலைவர் நிர்மல்ராஜ் உள்ளிட்டோர் உடன் சென்றனர்.