தூத்துக்குடியில் குடிநீர் பிரச்சினை விரைவில் சீராகும் : மேயர் ஜெகன் பெரியசாமி தகவல்!

தூத்துக்குடி மாநகரின் குடிநீர் பிரச்சினை  ஒரு வார காலத்திற்குள் சீராகிவிடும் என மேயர் ஜெகன் பெரியசாமி தெரிவித்தார்.

தூத்துக்குடி மாநகராட்சியில் நடந்து வரும் பணிகளை மேயர் ஜெகன் பெரியசாமி ஆய்வு செய்தார். அப்போது அவர் கூறியதாவது: கடந்த ஆண்டு பருவமழை குறைவாக பெய்துள்ளதால் மாநகர மக்களுக்கு குடிநீர் ஆதாரமாக விளங்ககூடிய பாபநாசம் அணை முழுமையாக நிரம்பவில்லை. தூத்துக்குடி மாநகராட்சியில் தற்போது நிலவிவரும் குடிநீர் தட்டுப்பாட்டினை நிவர்த்தி செய்ய அவசர நடவடிக்கைகள் மேற்கொள்ளப்பட்டு மாநகரத்தில் உள்ள 60 வார்டு பகுதி மக்களுக்கும் சீரான குடிநீர் வழங்க நடவடிக்கைகள் எடுக்கப்பட்டு வருகிறது. 

மேலும் மணிமுத்தாறு அணையில் இருந்து உடனடியாக கூடுதலான தண்ணீர் திறந்து விட நடவடிக்கை எடுக்கப்பட்டடுள்ளது. ஒரு வார காலத்திற்குள் குடிநீர் பிரச்சினை சீராகிவிடும். இவ்வாறு அவர் கூறினார். தொடர்ந்து அவர் நீரேற்று நிலைய பகுதிகளில் அவசர கால நடவடிக்கையாக ஆய்வு மேற்கொண்டார். அப்போது நீரேற்று நிலையத்திற்கு தண்ணீர் வரும் பாதையில் ஆக்கிரமிப்பு செய்துள்ள அமலை செடிகளை பொக்லைன் எந்திரம் கொண்டு அகற்ற உத்தரவிட்டு, சீரான நீர்வரத்து வருவதற்கான வேலைகளை தொடங்கி வைத்தார். ஆய்வின்போது ஆணையர் தினேஷ்குமார், துணை மேயர் ஜெனிட்டா, பொதுக்குழு உறுப்பினர் கோட்டுராஜா, மாமன்ற உறுப்பினர்கள், மாநகராட்சி அதிகாரிகள் உடன் இருந்தனர்.