ஆட்சியர் அலுவலகத்தில் ஸ்டெர்லைட் ஆதரவு கூட்டமைப்பினர் முற்றுகை: தூத்துக்குடியில் பரபரப்பு!

தூத்துக்குடி மாவட்ட ஆட்சியர் அலுவலகத்தில் ஸ்டெர்லைட் ஆதரவு கூட்டமைப்பினர் முற்றுகையிட்டதால் பரபரப்பு ஏற்பட்டது. 

தூத்துக்குடி ஸ்டெர்லைட் ஆதரவு கூட்டமைப்பு சேர்ந்த சுமார் 200 பெண்கள் உட்பட 300 பேர் மாவட்ட ஆட்சியர் அலுவலகத்திற்கு மனு கொடுப்பதற்காக வழக்கறிஞர் மணிகண்ட ராஜா தலைமையில் ஊர்வலமாக வந்தனர். அப்போது பாதுகாப்பு பணியில் இருந்த ரூரல் டிஎஸ்பி சுரேஷ் தலைமையிலான போலீசார் ஊர்வலத்திற்கு அனுமதியில்லை என்று கூறி அவர்களை தடுத்து நிறுத்தினர். 

இதனால் போலீஸ்கருக்கும் ஆதரவாளர்களுக்கும் வாக்குவாதம் ஏற்பட்டு சிறிது நேரம் பரபரப்பு நிலவியது.  பின்னர் 5பேர் மட்டும் மாவட்ட ஆட்சியரிடம் மனு அளிக்க அனுமதி அளிக்கப்பட்டது. அவர்கள் ஸ்டெர்லைட் ஆலையை திறக்க வேண்டும் என வலியுறுத்தி ஆட்சியரிடம் மனு அளித்தனர். ஸ்டெர்லைட் ஆதரவாளர்கள் ஊர்வலத்தால் தூத்துக்குடி - பாளையங்கோட்டை ரோட்டில் சுமார் 15 நிமிடங்கள் போக்குவரத்து பாதிக்கப்பட்டது. மேலும் ஆட்சியர் அலுவலகம் முழுவதும் பலத்த போலீஸ் பாதுகாப்பு போடப்பட்டிருந்தது.