தூத்துக்குடி ஜார்ஜ் ரோட்டை 8 வாரத்திற்குள் சீரமைக்க வேண்டும் : உயர்நீதிமன்ற மதுரை கிளை உத்தரவு

தூத்துக்குடி பனிமய மாதா ஆலயம் முதல் காமராஜ் கல்லூரி வரையிலான ஜார்ஜ் ரோட்டை 8 வாரத்திற்குள் சீரமைக்க வேண்டும் என உயர்நீதிமன்ற மதுரை கிளை உத்தரவிட்டுள்ளது. 

தூத்துக்குடி டவுண், தூய பனிமயமாத கோவில் முதல் காமராஜ் கல்லூரி வரை செல்லும் ஜார்ஜ் ரோடு எனப்படும் சாலை கடந்த 4 மாதங்களாக புதிய சாலை அமைப்பதற்காக ஏற்கனவே இருந்த சாலையானது உடைக்கப்பட்டு சேதப்பட்ட நிலையில் இருந்து வருகிறது. இதனால் அப்பகுதியில் வசிக்கும் மாதாகோவில் தெரு, மரக்குடி, ரோச் காலனி, லயன் ஸ்டோன், தோமையார் கோவில், தாமஸ்நகர், பாத்திமா நகர், சண்முகபுரம், வஉசி மார்க்கெட் செல்லும் மக்களும் மற்றும் பள்ளிகளுக்கு செல்லும் மாணவர்களுக்கு அந்த பகுதி வழியாக திருச்செந்தூர் சாலை செல்பவர்களும் மிகுந்த சிரமத்திற்கு ஆளாகி வருகின்றனர். 

அந்த சாலையை கடந்து செல்லும் போது, சாலையில் விபத்துக்களும் ஏற்படுகின்றன. மேலும் உடைந்து கிடக்கும் சாலையின் முன் கிளரும் தூசியால் அந்த சாலையை கடந்து செல்லும் மக்களுக்கு மூச்சு திணறலும் ஏற்படுகிறது. இதனால் அப்பகுதியை சேர்ந்த மக்களும், சாலையை கடந்து செல்லும் மக்களும் மிகுந்த சிரமத்திற்கு ஆளாகி வந்ததால், மேற்படி சாலையை புதிதாக அமைத்துத்தர கோரி வழக்கறிஞர்ஜோ.ஜோசப் ஜினோசன் என்பவர் கடந்த 09.11.2020 அன்று தூத்துக்குடி மாநகராட்சி ஆணையரிடம் வேண்டுகோள் மனு அளித்தார். மேற்படி மாநகராட்சி நிர்வாகமானது எந்தவொரு நடவடிக்கையும் எடுக்காத காரணத்தினால் வழக்கறிஞர் சென்னை உயர்நீதிமன்றம் மதுரை கிளையில் புதிதாக சாலை அமைக்க உத்தரவு பிறப்பிக்கும்படி பொதுநல வழக்கு 02.12.2020 அன்று தாக்கல் செய்தார்.

இந்த வழக்கின் இறுதி விசாரணை கடந்த 20.01.2021 அன்று இரண்டு நீதிபதிகள் சுந்தரேஷ், ஆனந்தி ஆகியோர் அடங்கிய அமர்வுமுன் விசாரணைக்கு வந்தது. அப்பொழுது வழக்கறிஞர் ஜோ.ஜோசப் ஜினோசன் மேற்படி சாலை உடைக்கப்பட்ட நிலையிலிருப்பதால் மக்களுக்கு ஏற்படும் சிரமங்களை எடுத்துரைத்தார். இருதரப்பு வாதத்தையும் கேட்ட உயர்நீதிமன்ற நீதிபதிகள் மேற்படி சாலையை எட்டு வாரத்திற்குள் சாலையை அமைக்க மாநில நெடுஞ்சாலைத்துறை டிவிஷனல் பொறியாளருக்கு உத்தரவிட்டனர்.