கோவில்பட்டியில் தென் மண்டல ஹாக்கிப் போட்டி தொடக்கம்

கோவில்பட்டியில் 17 வயதுக்குள்பட்ட பள்ளி மாணவர்களுக்கான தென் மண்டல ஹாக்கிப் போட்டி நேற்று தொடங்கியது.

கோவில்பட்டி  கிருஷ்ணா நகரில் உள்ள செயற்கை புல்வெளி ஹாக்கி மைதானத்தில் தொடங்கிய இப்போட்டியை மாவட்ட கல்வி அலுவலர் (இடைநிலை) ஜெயபிரகாஷ் ராஜன் தொடங்கி வைத்தார். இப் போட்டியில் 6 அணிகள் கலந்து கொள்கின்றன. காலிறுதி போட்டி வரை லீக் முறையிலும், அரையிறுதி மற்றும் இறுதிப் போட்டிகள் நாக்அவுட் முறையிலும் நடைபெறும்.

முதல் லீக் போட்டியில் திருநெல்வேலி விளையாட்டு விடுதி அணி 7-0 என்ற கோல் கணக்கில் கன்னியாகுமரி கார்மல் பள்ளி அணியை தோற்கடித்தது. 2ஆவது போட்டியில் கோவில்பட்டி வ.உ.சி அரசு மேல்நிலைப்பள்ளி அணி 6-2 என்ற கோல் கணக்கில் சிவகங்கை செயின்ட். ஜோசப் மேல்நிலை பள்ளி அணியை வீழ்த்தியது. 3ஆவது லீக் போட்டியில் திருநெல்வேலி விளையாட்டு விடுதி அணி 11-1 என்ற கோல்கணக்கில் பாளையங்கோட்டை எம். என். அப்துர் ரஹ்மான் அணியை தோற்கடித்தது. 4ஆவது லீக் போட்டியில் சிவகங்கை செயின்ட் ஜோசப் மேல்நிலைப் பள்ளி அணி 8-0 என்ற கோல் கணக்கில் தென்காசி எஸ். பி. கே. மெட்ரிக் மேல்நிலைப் பள்ளி அணியை வீழ்த்தியது.

சனிக்கிழமை மற்றும் ஞாயிற்றுக்கிழமை ஆகிய இரு தினங்கள் தென் மண்டல ஹாக்கிப் போட்டிகள் நடைபெறும். ஞாயிற்றுக்கிழமை நடைபெறும் இறுதிப் போட்டியில் வெற்றி பெறும் அணி மாநில அளவிலான போட்டிக்கு தகுதி பெறும்.

தொடக்க விழாவில், கோவில்பட்டி விளையாட்டு விடுதி மேலாளர் ரோஸ் பாத்திமா மேரி, போட்டி ஒருங்கிணைப்பாளர் பாலசிங்கம், மேலாளரும் ஹாக்கி யூனிட் ஆப் தூத்துக்குடி செயலர் குரு சித்ர சண்முக பாரதி, ஹாக்கி யூனிட் ஆப் தூத்துக்குடி பொருளாளர் காளிமுத்து பாண்டிராஜா, போட்டி துணை ஒருங்கிணைப்பாளர்கள் உள்பட பலர் கலந்து கொண்டனர்.