சூரியகுமார் யாதவ் அதிரடி அரைசதம்: ஜிம்பாப்வேயை வீழ்த்தி அரையிறுதிக்கு முன்னேறிய இந்தியா!

சூரியகுமார் யாதவ் அதிரடி அரைசதம் காரணமாக ஜிம்பாப்வே அணியை வீழ்த்தி இந்திய அணி டி20 உலக கோப்பையின் அரையிறுதிக்கு முன்னேறியது. 

உலக கோப்பை டி20 தொடரின் சூப்பர் 12 சுற்று 2வது பிரிவில் நடந்த கடைசி லீக் ஆட்டத்தில் இந்தியா - ஜிம்பாப்வே அணிகள் மோதின.இந்தியா ஏற்கனவே அரையிறுதி வாய்ப்பை உறுதி செய்துவிட்டதால், சம்பிரதாயமாக நடந்த இப்போட்டியில், டாஸ் வென்று பேட் செய்த இந்தியா 20 ஓவரில் 5 விக்கெட் இழப்புக்கு 185 ரன் குவித்தது.  கே.எல்.ராகுல் 51 ரன் (35 பந்து, 3 பவுண்டரி, 3 சிக்சர்), கேப்டன் ரோகித் 15, விராத் 26, பன்ட் 3, ஹர்திக் 18 ரன்னில் ஆட்டமிழந்தனர். சூரியகுமார் யாதவ் 61 ரன் (25 பந்து, 6 பவுண்டரி, 4 சிக்சர்), அக்சர் (0) ஆட்டமிழக்காமல் இருந்தனர்.  

ஜிம்பாப்வே பந்துவீச்சில் ஷான் வில்லியம்ஸ் 2, சிக்கந்தர், முஸரபானி, என்காரவா தலா 1 விக்கெட் வீழ்த்தினர். அடுத்து களமிறங்கிய ஜிம்பாப்வே 17.2 ஓவரில் 115 ரன்னுக்கு ஆல் அவுட்டானது. பர்ல் 35 ரன் (22 பந்து, 5 பவுண்டரி, 1 சிக்சர்), சிக்கந்தர் 34 ரன் (24 பந்து, 3 பவுண்டரி) எடுக்க, மற்ற வீரர்கள் சொற்ப ரன்னில் நடையை கட்டினர். இந்திய பந்துவீச்சில் அஷ்வின் 3, ஹர்திக், ஷமி தலா 2, புவி, அர்ஷ்தீப், அக்சர் தலா 1 விக்கெட் வீழ்த்தினர்.

சூரியகுமார் ஆட்ட நாயகன் விருது பெற்றார். 71 ரன் வித்தியாசத்தில் அபாரமாக வென்ற இந்தியா 2வது பிரிவில் 8 புள்ளிகளுடன் முதலிடம் பிடித்தது. சூப்பர் 12 சுற்றில் 4 வெற்றிகளைப் பெற்ற ஒரே அணி இந்தியா தான் என்பது குறிப்பிடத்தக்கது.