இந்திய மண்ணில் அதிக விக்கெட்: ஹர்பஜன் சிங்கை முந்தினார் அஸ்வின்

டெஸ்ட் போட்டிகளில் இந்திய மண்ணில் 268 விக்கெட்டுகளை கைப்பற்றி ஹர்பஜன் சிங்கை முந்தினார், அஸ்வின்.

இங்கிலாந்துக்கு எதிரான 2-வது டெஸ்டில் இந்திய அணியின் சுழற்பந்து வீச்சாளரான தமிழகத்தை சேர்ந்த 34 வயது ஆர்.அஸ்வின் 5 விக்கெட்டுகள் வீழ்த்தினார். அவர் பென் ஸ்டோக்ஸ் விக்கெட்டை சாய்த்த போது டெஸ்ட் போட்டியில் இந்திய மண்ணில் அதிக விக்கெட்டுகள் கைப்பற்றியவர்கள் வரிசையில் ஹர்பஜன் சிங்கை (265 விக்கெட்டுகள்) பின்னுக்கு தள்ளி 2-வது இடத்துக்கு முன்னேறினார். உள்நாட்டில் அதிக விக்கெட்டுகள் வீழ்த்தியவர் பட்டியலில் இந்திய முன்னாள் சுழற்பந்து வீச்சாளர் அனில் கும்பிளே 350 விக்கெட்டுகளுடன் முதலிடத்தில் உள்ளார். 76-வது டெஸ்ட் போட்டியில் ஆடும் அஸ்வின் இதுவரை 391 விக்கெட்டுகள் வீழ்த்தி இருக்கிறார். இதில் இந்திய மண்ணில் 268 விக்கெட்டுகள் சாய்த்ததும் அடங்கும்.

டெஸ்ட் போட்டியில் நேற்று அஸ்வின் ஒரு இன்னிங்சில் 29-வது முறையாக 5 விக்கெட்டுகளை அள்ளினார். இதன் மூலம் அவர் டெஸ்டில் அதிக முறை 5 மற்றும் அதற்கு அதிகமான விக்கெட்டுகளை வீழ்த்தியவர்கள் பட்டியலில், ஆஸ்திரேலிய முன்னாள் வேகப்பந்து வீச்சாளர் மெக்ராத்துடன் இணைந்து 7-வது இடத்தை பெற்றுள்ளார். இங்கிலாந்து வீரர் ஸ்டூவர்ட் பிராட் விக்கெட்டை வீழ்த்தியதன் மூலம் அஸ்வின் டெஸ்ட் போட்டியில் 200 இடக்கை பேட்ஸ்மேன்களின் விக்கெட்டை கைப்பற்றிய முதல் பவுலர் என்ற சிறப்பை தனதாக்கினார்.

இங்கிலாந்து புதிய சாதனை 

இந்தியாவுக்கு எதிரான 2-வது டெஸ்ட் போட்டியில் முதல் இன்னிங்சில் இங்கிலாந்து அணியினர் 329 ரன்கள் விட்டுக்கொடுத்தனர். ஆனால் அவர்கள் அந்த இன்னிங்சில் வைடு, நோ-பால், லெக் பை, பைஸ் உள்ளிட்ட எக்ஸ்டிரா வகையில் ஒரு ரன்னை கூட தாரை வார்க்காமல் புதிய சாதனை படைத்தனர். இதற்கு முன்பு இந்த வகையில் 1955-ம் ஆண்டில் பாகிஸ்தானுக்கு எதிரான டெஸ்டில் இந்திய வீரர்கள் 328 ரன்கள் கொடுத்து எக்ஸ்டிரா வகையில் ஒரு ரன் கூட வழங்காததே சாதனையாக இருந்தது.