தூத்துக்குடியில் பைக் விபத்தில் நிதி நிறுவன ஊழியர் பலி

தூத்துக்குடியில்  சாலையோரமாக நின்று கொண்டிருந்தபோது வேகமாக வந்த பைக் மோதிய விபத்தில் தனியார் நிதி நிறுவன ஊழியர் பரிதாபமாக உயிரிழந்தார்.

புதுக்கோட்டை மாவட்டம் வையாபுரிப்பட்டி பகுதியைச் சேர்ந்தவர் ராமையா மகன் செந்தில்குமார் (45). இவர் தூத்துக்குடியில் தங்கி இருந்து, இங்குள்ள ஒரு தனியார் நிதி நிறுவனத்தில் தினசரி பணம் வசூலிக்கும் முகவராக வேலை பார்த்து வந்தார். நேற்று வெள்ளிக்கிழமை மாலையில், தூத்துக்குடி அண்ணாநகர் 7-ஆவது தெருவில் உள்ள ஒரு தேநீர்க் கடையில் டீ குடித்துவிட்டு, அவர் சாலையோரமாக நின்று கொண்டிருந்தார்.

அப்போது அந்தச் சாலை வழியாக ஹரிராம் என்ற வாலிபர் தனது மோட்டார் சைக்கிளில் அதிவேகமாக வந்துள்ளார். எதிர்பாராதவிதமாக வாலிபரின் கட்டுப்பாட்டை இழந்த மோட்டார் சைக்கிள், சாலையோரம் நின்றிருந்த செந்தில்குமார் மீது மிகப்பலமாக மோதியது. இந்த அசாத்திய மோதலின் தாக்கத்தில் தூக்கி வீசப்பட்டுச் சாலையில் விழுந்த செந்தில்குமாருக்குத் தலை மற்றும் உடலில் பலத்த காயங்கள் ஏற்பட்டது.

அங்கிருந்த பொதுமக்கள் அவரை உடனடியாக மீட்டு, தூத்துக்குடி அரசு மருத்துவமனைக்குக் கொண்டு சேர்த்தனர். அங்கு மருத்துவர்கள் குழுவினர் தீவிரச் சிகிச்சை அளித்தும் பலனின்றி, செந்தில்குமார் பரிதாபமாக உயிரிழந்தார். இத்துயர விபத்து குறித்துப் பெறப்பட்ட புகாரின் பேரில், மத்திய பாகம் காவல் நிலையப் போலீஸார் வழக்குப் பதிவு செய்து, விபத்தை ஏற்படுத்திய வாலிபர் ஹரிராம் மீது அஜாக்கிரதையாக வாகனத்தை ஓட்டி மரணம் விளைவித்தல் உள்ளிட்ட குற்றவியல் பிரிவுகளின் கீழ் தீவிர விசாரணை மேற்கொண்டு வருகின்றனர்.