போக்சோ வழக்குகளில் தொடர்புடைய 3 பேர் குண்டர் சட்டத்தில் கைது!

தூத்துக்குடி மாவட்டத்தில் போக்சோ வழக்குகளில் சம்பந்தப்பட்ட மூன்று குற்றவாளிகள் இன்று ஒரே நாளில் தமிழ்நாடு தடுப்பு காவல் சட்டத்தின் (குண்டர் சட்டம்) கீழ் கைது செய்யப்பட்டு சிறையில் அடைக்கப்பட்டனர்.

தூத்துக்குடி அனைத்து மகளிர் காவல் நிலையம், கோவில்பட்டி அனைத்து மகளிர் காவல் நிலையம் மற்றும் குலசேகரன்பட்டினம் ஆகிய காவல் நிலைய எல்லைக்குட்பட்ட பகுதிகளில் நடைபெற்ற போக்சோ வழக்குகளில், தூத்துக்குடியைச் சேர்ந்த முருகேசன் (59), இசக்கிராஜா (22) மற்றும் விருதுநகரைச் சேர்ந்த கோபால்சாமி (47) ஆகியோர் சம்பந்தப்பட்டிருந்தனர். 

இவர்கள் மீது தமிழ்நாடு தடுப்பு காவல் சட்டம் 1982-ன் கீழ் கடும் நடவடிக்கை எடுக்க அந்தந்த காவல் நிலைய ஆய்வாளர்கள் வேண்டுகோள் விடுத்தனர். இதனைத் தொடர்ந்து, மாவட்ட காவல் கண்காணிப்பாளர் சி. மதன் பரிந்துரையின் பேரில், மாவட்ட ஆட்சியர் இளம்பகவத் இதற்கான உத்தரவைப் பிறப்பித்தார். அதன்படி, சம்பந்தப்பட்ட காவல் துறையினர் மேற்கண்ட 3 நபர்களையும் இன்று தமிழ்நாடு தடுப்பு காவல் சட்டத்தின் கீழ் கைது செய்து பாளையங்கோட்டை மத்திய சிறையில் அடைத்தனர்.

தூத்துக்குடி மாவட்டத்தில் குற்றச் செயல்களைக் கட்டுப்படுத்த காவல்துறை எடுத்து வரும் தொடர் நடவடிக்கையின் பயனாக, இந்த ஆண்டு இதுவரை மொத்தம் 25 நபர்கள் தமிழ்நாடு தடுப்பு காவல் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர் என்பது குறிப்பிடத்தக்கது.